सिंगम सारकिल्ले चित्रपट घातकी संदेश दितात
भांगरभूंय | प्रतिनिधी
न्यायाधीश गौतम पटेल हांचें मत
रोहित शेट्टी दिग्दर्शीत आनी अभिनेतो अजय देवगण मुखेल भुमिकेंत आशिल्ल्या सिंगम चित्रपट लोकांक बरोच आवडलो. आतां ह्या चित्रपटाच्या तिसर्या भागाचें शुटींग चालू आसा. देखून मुंबय उच्च न्यायालयाच्या न्यायाधीशान सिंघम चित्रपटा विशीं केल्लो कमेंट चर्चेचो विशय थारला. सिंघम सारकिल्ले चित्रपट घातकी संदेश दितात अशें मत न्यायाधीश गौतम पटेल हांणी मांडलां.
भारतीय पुलीस फावंडेशनान पुलीस सुदारणा दीस कार्यावळ घडोवन हाडली. तेन्ना न्यायाधीश पटेल उलयताले. फिल्मांनी न्यायाधीशाक नम्र, भित्रो आनी वायट कपड्यांनी दाखयतात. फिल्मांनी गुन्यांवकारांक सोडून दिवपाचो आरोप न्यायालयांचेर जाता. हिरो पुलीस आसता तोच न्याय दिता अशें न्यायमूर्ती पटेल हांणी सांगलें.
सिंघम चित्रपटाच्या क्लायमॅक्सांत पुराय पुलीस दळ प्रकाश राज हांणी साकारिल्ल्या राजकारण्याचेर तुटून पडटात आनी न्याय मेळयल्ल्याचें दाखयलां. पूण हांव विचारपाक सोदतां, तो न्याय आसा व्हय? आमी विचार करपाक जाय हो संदेश कितलो घातकी आसा तो, अशें न्यायाधीशान म्हणलें.
‘गुंड, भ्रश्ट आनी बेजबाबदार’ अशी पुलिसांची प्रतिमा लोकप्रीय जावन आसा. न्यायालयां आपलें काम करीनात अशें भौसाक दिसता तेन्ना पुलीस भितर सरून सण मनयतात. देखूनच बलात्काराच्या आरोपीक पळून वचपाचो यत्न करतना एन्कावंटरांत मरण येता. त्या वेळार लोकांक दिसता, तें योग्य न्हय. पूण अजूनय न्याय मेळपाची भावना आसता. अशे विचार खोलायेन रुजोवन दवरल्यात अशें न्यायमूर्ती पटेल हांणी सांगलें.
इतली घाई कित्याक? खंयच्याय गुन्यांवांत कायदेशीर प्रक्रिये प्रमाण कारवाय जावपाक जाय. थंय निरपराधी वा गुन्यांवकार थारतात. ही प्रक्रिया ल्हव चलता. तशें जावंक जाय… कारण खंयच्याच मनशाची स्वातंत्र्यताय काडून घेवपाक फावना अशें न्यायमुर्ती पटेल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
