इस्रोचो चांद्रयान-३ च्या लँडर आनी रोव्हरा कडेन संपर्क सादपाचो यत्न
भांगरभूंय | प्रतिनिधी
बंगळुरू, खबरां संस्था: इस्रो आयज चांद्रयान-३ च्या लँडर आनी रोव्हरा कडेन संपर्क सादपाचो यत्न करतलें. हाचे आदीं २२ सप्टेंबराक सांजवेळार हो यत्न करपाचो आशिल्लो, पूण कांय कारणांक लागून तो फुडें धुकल्लो. स्पेस ऍप्लीकेशन सेंटराचे संचालक नीलेश देसाय हांणी ही म्हायती दिल्या.
१४ दिसांचे राती उपरांत सुर्याचो उजवाड परत एक फावट चंद्राच्या दक्षिण ध्रुवा मेरेन पावपाक लागला. अशे परिस्थितींत स्लीप मोडांत दवरिल्ल्या विक्रम लँडर आनी प्रज्ञा रोव्हराक जागे करपाची आस्त इस्रोक आसा. इसरोन ४ सप्टेंबराक लँडराक स्लीप मोडांत घालो. हाचे आदीं २ सप्टेंबराक रोव्हराक स्लीप मोडांत घातिल्लो. इस्रोन लँडर-रोव्हरचे रिसीव्हर्स चालूच दवरल्यात.
भारताची चंद्रार ही तिसरी मोहीम
चांद्रयान-१ चे प्रक्षेपण २००८ त जाल्लें. हातूंत एका प्रोबचें क्रॅश लँडींग जालें. जाचे वरवीं चंद्राचेर उदक साञपडलें. उपरांत २०१९ त चांद्रयान- २ चंद्रा लागसारा पावलें, पूण तें देवूंक शकलें ना. चांद्रयान- ३ चंद्राचेर २३ ऑगस्टाक देंवलें. तांणी बरे भाशेन पाविल्ल्याचो संदेशूय दिलो.
सौर पॅनलांचेर सुर्याचो उजवाड पडटा ते दिकेन रोव्हर
लँडर आनी रोव्हर स्लीप मोडांत घालचे पयलीं इस्रोन बॅटरी पुराय चार्ज करून दवरली. रोव्हर अशे दिकेन दवरिल्लो जातूंत सुर्योदयाच्या वेळार सुर्याचो उजवाड सरळ सौर पॅनलांचेर पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
