मांद्रेंतल्या ‘फोंडकुल रस्त्यां’ कडेन बांदकाम खात्याची आडनदर
भांगरभूंय | प्रतिनिधी
पेडणें, प्रतिनिधी: मांद्रें मतदारसंघाच्या रस्त्यांची अवस्था बाबत जायत चल्ल्या. चवथीक ह्या वाठारांतल्या लोकांक ह्या रस्त्यांचेर पडिल्ल्या फोंडकुलांतल्यान वाट काडीत भोंवचें पडटा. लोकांनी अंदूं गणरायाकूय ह्या फोंडकुलांतल्यान घरा हाडून विराजमान केलो तशेंच विसर्जनूय ह्याच रस्त्यां वेल्यान व्हरून केलें. मांद्रें मतदारसंघांतल्या मोरजी, तुयें, आश्वें, मांद्रें, जुनसवाडो, हरमला ह्या रस्त्यांची सामकी वायट अवस्था जाल्ली पळोवपाक मेळटा.
भौशीक बांदकाम खातें, रस्तो विभाग मंत्री, अधिकारी हाचे कडेन लक्ष दिना हें ह्या रस्त्या कडेन नदर भोंवडायल्या उपरांत कळटा. हांगच्या रस्त्यांचेर पडिल्ल्या फोंडकुलांनी पावसाचें उदक सांठून उरिल्ल्यान तीं कितलीं खोल आसात हाचो अंदाज येना. हाका लागून बरेच अपघात जातात. तशेंच दोन चाकी वाहनांक ह्या फोंडकुलांचो बरोच त्रास सोंसचो पडटा.
चवथी पयलीं तरी हे रस्ते फोंडकुलां मुक्त जातले अशी आस्त आशिल्ली. मात सरकार आनी भौशीक बांदकाम खातें हाचे कडेन पुरायेन आडनदर केली.
वीज खात्यान ३३ केव्ही वीज केबल जमनी पोंदच्यान घालपा खातीर रस्ते खणिल्ले. वीज खात्याच्या कंत्राटदारान रस्ते खणले, केबल घातले आनी गेले. रस्ते खणल्या उपरांत ते आदले वरीं करपाची जापसालदारकी बांदकाम खात्याची आशिल्ली. पूण हाचे कडेन ह्या विभागान आडनदर केल्या. हे रस्ते सारके करपाची मागणी हांगचे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
