भांगरभूंय | प्रतिनिधी
फाल्यां विक्रम आनी प्रज्ञान परतून सक्रीय जातले अशी आस्त
बंगळुरू, खबरां संस्था: चंद्राचेर परत एक फावट हालचाल जातना दिसतली. चंद्रार सूर्य उदेतलो. विक्रम लँडर ज्या जाग्यार आसा त्या शिवशक्ती बिंदूचेर २२ सप्टेंबराक सुर्याचो उजवाड पडटा. लँडीगा उपरांत ११ दिसांनी विक्रम लँडर आनी प्रज्ञा रोव्हरा स्लीप मोडांत घाल्लें. चंद्राचेर दोनूय आशी कुशीक आसात. विक्रम आनी प्रज्ञान सुर्योदया उपरांत परतून सक्रीय जावपाची शक्यताय आसा. विक्रम लँडर आनी प्रज्ञा रोव्हर हांचे कडेन परतून संपर्क सादपाचो यत्न जातलो. फुडलीं कांय वरां चंद्रयान-३ खातीर म्हत्वाचीं आसात. शिवशक्ती पॉयंटाचेर बेगीनूच सुर्योदय जातलो अशें इसरोन बिरेस्तारा सांगलें. विक्रम आनी प्रज्ञाक सुर्याचो उजवाड मेळटलो. हे दोनूय उपकरणां परतून सुरू जावपाची अपेक्षा आसा.
रोव्हर आनी लँडर अशे तरेन दवरल्यात, जेन्ना सुर्योदय जातलो तेन्ना सुर्याचो उजवाड सरळ पॅनलाचेर पडटलो. चांद्रयान-३ मिशना खाला चंद्राचेर विक्रम लँडर आनी प्रज्ञा रोव्हर धाडलो. लँडर आनी रोव्हर हांचे वरवीं चंद्राचेर जायते प्रयोग जाले. आतां २२ सप्टेंबराक विक्रम आनी प्रज्ञान परतून सक्रीय जातले अशी आस्त आसा. दोगूय परतून सक्रिय जावन कामाक सुरवात जातली अशी आस्त बाळगिल्ल्याचें इसरोचे मुखेली सोमनाथ हांणी सांगलें.
चंद्रयान-३ तारीख २३ ऑगस्टाक सांजवेळा ६:४० वरांचेर चंद्राचेर देंवलें. अशें करून भारतान एक नवो इतिहास निर्माण केलो. चंद्राच्या दक्षिण ध्रुवा मेरेन पावपी संवसारांतलो पयलो देश भारत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
