भारतीय अॅथलेटिक्स सज्ज

भांगरभूंय | प्रतिनिधी

23 सप्टेंबरा सावन चीनाच्या होगझोऊ शारांत आशियायी खेळां सर्तीक सुरवात जातली. भारताचें प्रतिनिधित्व करपा खातीर 656 खेळगडे सज्ज आसात. हे खेपे भारताचो सगल्यांत व्हडलो पंगड देशाचें प्रतिनिधित्व करतलो. अशे स्थितींत भारताच्या खेळगड्यां कडल्यान उत्कृश्ट प्रदर्शनाची आस्त आसा.

भालो फेक नीरज चोपडा, वेटलिफ्टर मीराबाई चानू, कुस्ती खेळगडो बजरंग पुनिया हांचेर नदर आसतली.

नीरज चोपडान हालींसाकार जबरदस्त प्रदर्शन केल्ल्यान ताच्या कडल्यान आशियायी खेळांत भांगरा पदकाची आस्त वाडल्या. 25 वर्सां पिरायेच्या ह्या खेळगड्यान अंदूंच्या हंगामांत अजून मेरेन दोळे दिपकावपी प्रदर्शन केलां. नीरजान डायमंड लिगेंत 88.67 मिटर आनी 87.66 मिटर इतको लांब भालो फेक केला. तशेंच संवसारीक वस्तादपण सर्तींत ताणें 88.17 मिटर लांब भालो फेक करून भांगरा पदक लेगीत जिखलां.

मीराबाई चानू ही आशियायी खेळांत वांटो घेवपी दोन भारतीय वेटलिफ्टरांतली एक आसा. टोकियो ऑलिम्पिकांत रुप्या पदक जिखपी चानू ही 49 कील वजन गटांत वांटेकार जातली. 29 वर्सां पिरायेचे हे खेळगडयेचें भांगरा पदकाचेर लक्ष आसतलें. तशें केल्यार भांगरा पदक जिखपी ती भारताची पयली वेटलिफ्टर थारतली. मीराबाईन हालींच संवसारीक सर्त जिखल्या. आशियायी खेळांत तिका अजून मेरेन पदक जिखपाक जमूंक ना. पोडियमांतली पयली सुवात मेळोवपा खातीर तिका चीनाचे जियांग हुइहुआ कडल्यान खर आव्हान मेळुये.

आशियायी खेळांतल्या फाटल्या हंगामांत कुस्तींत भांगरा पदक जिखपी बजरंग पुनिया हो एकोडो भारतीय मल्ल आशिल्लो. बजरंगान टोकियो ऑलिम्पिकांत कांश्या पदक जिखिल्लें. आतां आशियायी खेळांत पदक जिखपाचो ताचो हावेस आसतलो. रवी दहिया आशियायी खेळा खातीर पात्र थारूंक ना. ताका लागून देशाची नदर बजरंगाचेर आसतली. बजरंगाक निवड चांचणेंत वांटो घेवपा पसून मेकळीक मेळिल्ली.

27 वर्सां पिरायेची निखित जरीन आशियायी खेळांत पदार्पण करतली. फाटल्या दोन वर्सांत तिणें भारताची सर्वोत्कृश्ट बॉक्सर म्हणून मुखार आयल्या. 2022त तिणें संवसारीक चॅम्पियनशिपींत वस्तादपण जोडिल्लें. त्याच वर्सा तिणें राष्ट्रकूल खेळां सर्तींत लेगीत भांगरा पदक जिखिल्लें. वर्साचे सुरवातीक तिणें संवसारीक वस्तादपण राखपाक येस मेळयिल्लें. ताका लागून आशियायी खेळांत लेगीत तिच्या कडल्यान भांगरा पदकाची आस्त आसा.