भांगरभूंय | प्रतिनिधी
पर्वरेच्या संजय स्कुलाचो विद्यार्थी सिडनी डिसोझा (42) हाचें मरण सगल्यांच्याच काळजाक चुरको लावन गेलें. आधारकार्डांत दुरुस्ती करपाक तो आवय वांगडा संजय स्कूलाचे पोरणें इमारतींत आयिल्लो. तेन्ना दुसरे माळये वयल्या रेलिंगाक तेंकून रावलो आनी…. कळमेल्ले ग्रिल्स तुटिल्ल्यान वयल्यान पत्र्यांचेर आनी उपरांत सकयल पडलो. ही दुर्घटना आसली तरी तिका निश्काळजीपणा जापसालदार आसात. पोरणें इमारतीचो वापर कमी जालो तरी तातूंत कार्यालयां वा मनशांचो वावर आसल्यार वयर वचपाचीं सोंपणां, बाल्कनी, पासयेंतले ग्रील्स, कठडे, रेलिंग्स सारकें आसपाक जाय. ते नात जाल्यार दुर्घटना जावपाची भिरांत आसता. पणजे शारांतलींय कांय कार्यालयां, तांचीं लाकडी जमीन, पांखें, वण्टी, लिफ्टी धोकादायक स्थितींत आसात. संजय स्कूलाच्या जाळवणदारांनी रेलिंगाच्या ग्रिल्साचे दुरुस्ती कडेन लक्ष दिवंक नाशिल्ल्यान ही दुर्घटना घडली, अशें गोंय दिव्यांग हक्क संघटना (ड्रॅग) म्हणटा, तें चुकीचें न्हय. वेळारुच दुरुस्ती केल्ली जाल्यार सिडनीचो जीव वच्चो नाशिल्लो. सरकारी कामां खातीर, मुलाखतीं खातीर कांय वेळार शेंकड्यांनी लोक येतात. कांय कार्यालयांनी तर सकाळचो आदेस गर्दी आसताच….. आनी हातूंतले चडशे रेलिंगांक तेंकून उबे आसतात. कांय कडेन शिमिटाची 3- 4 फूट उंचायेची वणत आसता. पूण संबंदीत खात्यान हे ग्रील्स सारके आसात काय नात, ताची अदींमदीं तपासणी करूंक फावो. कारण, कोणाक वयल्यान पडून मरण आयलें जाल्यार तो फौजदारी गुन्यांव थारता, हें संबंदीत अधिकाऱ्यांनी विसरचें न्हय. बांदकाम खात्यान चवथी उपरांत ‘दुर्घटनामुक्त इमारत, सुरक्षीत इमारत’ मोहीम हातांत घेवन राज्यांतल्या इमारतींची तपासणी करची. कार्यालय ल्हान आनी कर्मचारी चड. थंय येवपी मनीस तांचे 10 पटीन… असले परिस्थीतींत गोंयचीं बरींच कार्यालयां चलतात. तेन्ना सरकारी यंत्रणेन हें मनार घेवचेंच.
ड्रॅगाच्या मतान, सिडनीचेर हाॅस्पिटलांत उसरां उपचार जाले. ताची स्थिती कितली गंभीर आसा, हाचो अदमास घडये दोतोरांक येवंक ना आसतलो. आयसीयूंत व्हरचे बदला ताका जनरल वाॅर्डांत दवरलो. कांय वेळान ताची भलायकी आनीक इबाडली. ताचे कंबरे सकयलो भाग लुळो पडलो. कांय दिसांनी ताका मरण आयलें. ताचें कुटुंब गरीब. घरांत जोडकार कोण ना. ताका लागून सिडनीच्या कुटुंबाक सरकारा वतीन अर्थीक मजत मेळप गरजेची. सरकारी इमारतीची परिस्थिती ताच्या मरणाक जापसालदार थारल्या. राजकी पक्षांनी, ड्रॅगान ताच्या कुटुंबाक उणेच 50 लाख रुपया दिवपाची मागणी केल्या. ह्या पुराय घडणुकेची सचीव पांवड्यार चवकशी करची, अशेंय तांणी मागलां. समाज कल्याण मंत्री सुभाष फळदेसाय हांणी अर्थीक मजत मेळोवन दिवपाचें आस्वासन दिलां. तें दोन म्हयन्यां भितर पुराय जातलें अशी आस्त. अर्थांत, ड्रॅगाकूय हो विशय लावन धरचो पडटलो!
गोंयांतले कितले दिव्यांग व्यक्ती कार्यालयांत येवन काम करतात, घरांतल्यान कितले काम करतात, तांच्यो अडचणी, समस्या, सुविधा… आनी हेर गजालींक प्राधान्य दिवन सरकारान दिव्यांगांक थाकाय दिवंक जाय. ते आमचेच, समाजाचेच. तांकां दुय्यम वागणूक कित्याक? सवलती, अनुदानांचेर खोटल्यांनी सरकारी पयसो खर्च जाता. तो जांकां मेळटा, तातूंतल्या कांय जाणांक ताची गरजूय नासता. पोटभर भूस मारून धेंकर दिवप्याक खिरीची वाटी दिवपा सारकें हें. समाजांतल्या जापसालदार आनी जागृत लोकांनी हाचेर आवाज काडपाक जाय. कारण हो पयसो गोंयकारांनी फारीक केल्ल्या टॅक्साचो. खरेंच गरज आसा, तांकां त्यो मेळच्यो. दिव्यांग, जांकां नोकरी, वेवसाय करप शक्य ना, नोकरी करनाशिल्ल्यो विधवा हांचे कडेन सरकारी यंत्रणांनी पयलीं लक्ष दिवप गरजेचें. दरवर्सा अपघात जावन गोंयांत उणेच साडेतिनशे लोक मरतात. हातूंतले अर्ध्या वयर जोडकार आसतात. ते वा घरांतलो तरणाटो वचप कितलें दुखदिणें आनी अर्थीक, मानसीक धपको दिवपी आसता, तें जांकां भोगता तांकांच कळटा! दिव्यांग जाल्ले बरेच तरणाटे समाजांत आसात. तांकां रेश्पेदान जगपा खातीर सरकारान मजतीचो हात दिवचो. सरकारी यंत्रणांची ती लागणूक.
सिडनी सारक्यो दुर्घटना आनीक जावच्यो नात, हाचे कडेन आतां लक्ष दिवचें पडटलें. सरकारान हे पुराय घडणुकेचो अहवाल मागयला. बरी गजाल. तो बेगीन येवचो आनी हातांत पडटकच तो बेगोबेग चालीक लागचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
