भांगरभूंय | प्रतिनिधी
खबरां संस्था
कोलंबोः आशिया कप क्रिकेट सर्तींतले आपले पयलें मॅचींत पाकिस्तानाक एकतर्फी मॅचींत हारोवपी भारतान हे सर्तीचें फायनींत ताचीच पुनरावृत्ती करून श्रीलंकेक 10 विकेटीनी हारोवन तांच्याच मैदानार तांचे एके तरेन लंका “दहन” केलें. टॉस जिखून बॅटिंग करपाचो लंकेचो कॅप्टन दासुन शनाकाचो निर्णय आत्मघाती थारलो आनी भारतान आशिया कप सर्तींत आठवे फावट चॅम्पियन जावपाचो मान मेळयलो.
मोहम्मद सिराज श्रीलंकेचो कर्दनकाळ थारलो. ताणे 21 बॉलांत 6 विकेटी घेतल्यो. सिराज, हार्दिक पंड्या आनी जसप्रीत बुमराह हांच्या वादळी बॉलिंगे सामकार श्रीलंकेचो डाव 15.2 ओव्हरींत 50 धांवड्यांत सोपलो. भारतान 6.1 ओव्हरींत 10 विकेटींनी आरामांत जैत मेळयलें. 19 दीस चलिल्ले हे सर्तींत 13 मॅची जाल्यो आनी तांची सांगता भारताच्या म्हाजैतान जाली.
भारतान 2018 वर्सा आशिया कप सर्त जिखल्ली. आतां पांच वर्सां उपरांत रोहीत शर्माच्या फुडारपणा खाला भारतान परत एक फावट आशिया कपाचेंर आपलें नांव कोरातींत केलें. श्रीलंका पंगड हे फावट हारलो तरी स फावट तांणी ही सर्त जिखून दाखयल्या. भारतान 1984, 1988, 1990-91, 1995, 2010, 1016 आनी 2018 वर्सा ही सर्त जिखल्ली. भारतान ही सर्त वन-डे फॉर्मेटांत सात फावट आनी टी-20 फॉर्मेटांत एक फावट जिखल्या. पाकिस्तान दोन फावट चॅम्पियन जाला.
श्रीलंकेची राजधानी कोलंबोत आर प्रेमदासा स्टेडियमाचेर जाल्ले किताबी लडतींत श्रीलंकेन टॉस जिखून पयलीं बॅटिंग करपाचो निर्णय घेतलो. भारतीय बॉलरांनी कहर केलो. सिराज, पंड्या आनी बुमराहाच्या बॉलिंगें सामकार श्रीलंकेचो डाव सुरवेक सावन कोसळत गेलो. कुशल मेंडीस (17) आनी दुशन हेमंता (नाबाद 13) सोडून एकलोय बॅट्समन दोन अंकी धांवड्यो करपाक शकलो ना. सिराजान 6, हार्दिकान 3 आनी बुमराहान 1 विकेट घेतली. जैता खातीर जाय आशिल्ल्यो धांवड्यो भारतान फकत 37 बॉलांत केल्यो ओपनर शुभमन गील 19 बॉलांत 27 धांवड्यो करून आनी इशान किशन 18 बॉलांत 23 धांवड्यो करून नाबाद रावलो. शुभमनान 6 आनी इशानान 3 चौके मारले,
एका ओव्हरींत 4 विकेटी
मोहम्मद सिराजान वट्ट 6 विकेटी घेतल्यो. तातूंतल्या चोर विकेटी ताणे एकाच ओव्हरींत घेतल्यो. सिराजान मॅचींतले चवथे आनी स्वताचे दुसरे ओव्हरींत ही कामगिरी केली. एका ओव्हरींत चार विकेटी घेवपाचो विक्रम सिराजान केलो. 49 वर्सांच्या भारताच्या वन-डे इतिहासांत पयलेच फावट एका भारतीय बॉलरान एका ओव्हरींत चार विकेटी घेवपाचो पराकम केला. सिराजान 6 विकेटी घेतल्यो तरी ताका एक विक्रम मोडपाक मेळ्ळो ना.
वन-डेंत सगल्यांत बरी बॉलींग करपाचो, सगल्यांत चड विकेटी घेवपाचो विक्रम स्टुअर्ट बिन्नीच्या नांवार आसा. ताणे 2014 वर्सा मीरपूर हांगा बांगलादेशा आड 6 ओव्हरींत 4 धांवड्यो दिवन 6 विकेटी घेतिल्ल्यो. ताचे पयलीं व्हो विक्रम स्पीनर अनिल कुंबळेच्या नांवार आशिल्लो. ताणे 1993 वर्सा कोलकाताच्या ईडन गार्डनाचेर वेस्ट इंडिजा आड वन-डेंत 6 ओव्हरींत 12 धांवड्यो दिवंन 6 विकेटी घेतिल्ल्यो. हे वळेरेंत सिराजान तिसरो नंबर मेळयला. ताणे 6 ओव्हरींत 21 धांवड्यो दिवंन 6 विकेटी घेतल्यो.
जैताचो दुकोळ सोपलो
आयतारच्या जैतान भारताचो आंतरराष्ट्रीय सर्तींतलो पांच वर्सांचो जैताचो दुकोळ सोपलो. आशिया कप 2023 सर्ती पयली भारतान 2018 वर्सा आशिया कप जिखल्लो. तेन्नाय कॅप्टन रोहीत शर्माच आशिल्लो. आयतारा ताच्या फुडारपणा खाला भारत आशिया चॅम्पियन थारलो. 2018 वर्सा उपरांत भारत म्हत्वाच्यो मॅची आनी प्रसंगाचेर वर्चस्व दवोरपाक अपेशी थारल्लो. भारतान 2019 वर्साच्य वन-डे वर्ल्ड कप आनी 2022 वर्सा टी-20 वर्ल्ड कप सर्तीचे सेमी फायनलींत प्रवेश केल्लो. 2021चे वर्ड टॅस्ट चॅम्पियनशीप फायनलींत न्यूझिलंडा कडल्यान आनी 2023चे वर्ल्ड टॅस्ट चॅम्पियनशीप फायनलींत ऑस्ट्रेलिये कडल्यान भारताक हार खावची पडल्ली. पोरूचे आशिया कप सर्तींत श्रीलंकेन जैत मेळयल्लें. 2022 वर्सा आशिया कप टी-20 फॉर्मेटांत खेळयल्ली.
प्रेमदासा स्टाफाक 42 लाख
बीसीसीआयचो सचीव आनी आशियाई क्रिकेट परिशदेचो अध्यक्ष जय शाह हाणे कोलंबोच्या आर प्रेमदासा स्टेडियमाच्या ग्रावंड स्टाफाक 50 हजार अमेरिकन डॉलर (42 लाख रुपया) जाहीर केल्यात. ग्रावंड स्टाफाच्या कामाची ताणे तोखणाय केल्या. तांचें कामगिरीक लागून आशिया कप फायनल आडमेळ्या विणे जावपाक शकली हे खातीर ताणे तांकां हें इमाम दिला. आशिया कॅप म्ँचीं मजगती पावस पडटालो, फायनलींत टॉक उडयल्या उपरांत पावस पडलो. मात ग्रावंड स्टाफाचे मजतीत मैदान खेळपाक तयार केले. तऱीय फायनल 40 मिनटां उसरां सुरू जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
