सुमीत नागलाक जैत

भांगरभूंय | प्रतिनिधी

सुमीत नागलान अॅडम माउंडिरा आड सरळ सेटांनी जैत जोडून मोरोक्को आड चालू आशिल्ले डॅव्हिस टॅनीस करंडाच्या संवसारीक गट दोनांत भारताक 1-1 अशी बरोबरी सादून दिली. ते पयलीं शशीकुमार मुकुंदाक दुखापतीक लागून मॅच अर्दकुटी सोडची पडिल्ली. ताका लागून भारत 0-1 असो फाटीं पडिल्लो. यासिन दलिमी आडची मॅच अर्दकुटी सोडिल्ली त्या वेळार स्कोर 7-6, 5-7, 1-4 असो आशिल्लो. मॅची हांगाच्या विजयंत खांड मिनी स्टेडियमाचेर जाल्यो.

26 वर्सां पिरायेच्या शशीकुमारान बरो खेळ केलो. पूण, तीन वरां आनी आठ मिनटां कोर्टा रावल्या उपरांत ताचे स्नायू दुखलें. ताणें वैजकी आदार लेगीत घेतलो. पूण, ताका मॅच पुर्ण करपाक जमली ना.

मजगतीं, भारताची डॅव्हिस टॅनीस करंडाच्या संवसारीक गट दोनांत घसरण जाल्या.

दोनूय पंगडांचेर नदर मारली जाल्यार भारताचें दालें जड दिसता, तशेंच भारतीय टॅनीस मोग्यांची नदर रोहन बोपन्नाचेर आसतली. तो आपली निमाणी टॅनीस करंड सर्तींत खेळटलो. डॅव्हिस करंड 2019 सावन नव्या स्वरुपांत खेळतात. पूण, थंयच्यान भारताची पयलेच खेपे संवसारीक गट दोनांत घसरण जाली. अंदूं टॅनीस मळार भारता खातीर बऱ्यो घडामोडी घडूंक ना.

भारताक डॅव्हिस टॅनीस करंडांतले लडतींत डॅनमार्का कडल्यान 3-2 अशी हार घेवची पडली. युकी भांबरी एकोड्या गटांतल्यान फाटीं सरून दोट्टी गटांत खेळपाक सुरवात केली. रामकुमार रामनाथनाची संवसारीक क्रमवारींत 550च्या सकयल घसरण जाली. तशेंच भारतान एटीपी 250 सर्तीचें येजमानपद लेगीत वगडायलें. भारता खातीर अंदूं अजून मेरेन एकूच बरी गजाल घडल्या. रोहन बोपन्नान अमेरिकन ओपनांत दादल्यांच्या दोट्टी गटांत उप वस्तादपण जोडलें.