भांगरभूंय | प्रतिनिधी
हॅन्रीक क्लासेनाच्या विस्फोटक खेळी नेटार दक्षीण आफ्रिकेन ऑस्ट्रेलिया पंगडाक 164 धांवड्यांनी हारयलो. वन डे माळेचे चवथे मॅचींत जैत जोडून आफ्रिकेन पांच मॅचींचे माळेंत 2-2 अशी बरोबरी मेळयली. पांचवी आनी निमाणी मॅच आयज जोहान्सबर्गांत जातली.
सेंच्युरियनांत येजमान दक्षीण आफ्रिकेन निर्धारीत 50 ओव्हरींनी 5 विकेटी वगडावन 416 धांवड्यो केल्यो. मोखीचो फाटलाव करतना ऑस्ट्रेलिया पंगडाक 34.5 ओव्हरींनी 252 धांवड्यो करप शक्य जाल्यो. फकत 83 बॉलांनी 174 धांवड्यांची खेळी करपी आफ्रिकेच्या क्लासेनाची मॅन ऑफ मॅच पुरस्कारा खातीर निवड जाली.
दक्षीण आफ्रिका वन डे क्रिकेटीच्या इतिहासांत सगल्यांत चड 400 परस चड धांवड्यो करपी पयलो पंगड थारलो. ताणें सातवे खेपे 400 परस चड धांवड्यो केल्यो. ताणें भारताक फाटीं घालो. भारतान स खेपे 400चो आंकडो हुपला.
पांचवे सुवातेर बॅटींग करपाक मैदानाचेर देंवपी क्लासेनान आक्रमक बॅटींग केली. ताणें फकत 83 बॉलांनी 209.63 स्ट्रायक रेटीन 174 धांवड्यो केल्यो. हातूंत 13 चवक्यांचो आनी 13 सक्यांचो आस्पाव आशिल्लो.
डॅव्हिड मिलर आनी क्लासेन हांणी पांचवे विकेटी खातीर 94 बॉलांनी 222 धांवड्यांची विक्रमी भागिदारी केली. मिलरान 45 बॉलांनी 82 आनी क्लासेनान 42 बॉलांनी 129 धांवड्यांचें योगदान दिलें. हे भागिदारीक लागून आफ्रिकेक 400चो पांवडो हुपपाक शक्य जालें. क्लासेन 50वे ओव्हरीच्या निमाण्या बॉलाचेर बाद जाल्ल्यान ही जोडी फुटली.
ऑस्ट्रेलिये वतीन जोश हेजलवुडान दोन विकेटी घेतल्यो. स्टोयनीस, मायकल नेसर आनी नॅथन एलीस हाका दरेकी एक विकेट फावो जाली.
417 धांवड्यांचो फाटलाव करपी ऑस्ट्रेलिये वतीन एलेक्स कॅरीन 77 बॉलांनी 99 धांवड्यो केल्यो. ताका एके धांवडेन शेंकडो चुकलो. ताका सोडलो जाल्यार ऑस्ट्रेलियेच्या एकाय बॅट्समनाक खाशेली बॅटींग करपाक जमली ना.
आफ्रिके वतीन लुंगी एनगिडीन चार विकेटी घेतल्यो. कगिसो रबाडाक तीन विकेटी फावो जाल्यो. मार्को यानसेन आनी केशव महाराज हांकां एकेक विकेट फावो जाली. ट्रॅव्हिस हेड रिटायर्ड हर्ट जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
