भांगरभूंय | प्रतिनिधी
भारत आनी येजमान श्रीलंका ह्या पंगडां मदीं आयज आशिया करंड क्रिकेट सर्तीची फायनल जातली. हे सर्तीच्या इतिहासांत दोनूय पंगड फायनलींत आठवे खेपे एकामेका आड खेळटले. आशिया करंड क्रिकेट सर्ती खेरीत दोनूय पंगड एकामेका आड 12 वेगळ्यावेगळ्या सर्तीच्या फायनलींत खेळ्ळ्यात. हातूंत संवसारीक वन डे क्रिकेट सर्तीची फायनल, संवसारीक टी-20 क्रिकेट सर्तीची फायनल आनी चॅम्पियन्स ट्रॉफीचे फायनलीचो आस्पाव आसा.
आयसीसी, एसीसी आनी तिरंगी माळ हे सारक्या सर्तींनी मेळून भारत आनी श्रीलंका ह्या पंगडां मदीं 20वी फायनल जातली. दोनूय पंगडां मदीं जाल्ल्या 19 फायनलींतल्यो 9 मॅची श्रीलंकेन आनी 9 मॅची भारतान जिखल्यात. एके फायनलींचो निकाल लागूंक ना.
दोनांय पंगडां मदली निमाणी फायनल 2014त जाल्ली. त्या वेळार बांगलादेशांत आयोजीत संवसारीक टी-20 सर्तीचे फायनलींत एक पंगड एकामेका आड खेळिल्ले. त्या वेळार श्रीलंकेन भारताक 6 विकेटींनी हारयिल्लो.
2011त भारतांत संवसारीक वन डे क्रिकेट सर्त जाल्ली. त्या वेळार भारतान श्रीलंकेक हारयिल्लो. सगल्यांत चड फायनलींत एकामेका आड खेळपाचो संवसारीक विक्रम ऑस्ट्रेलिया आनी वॅस्ट इंडिज ह्या पंगडांच्या नांवार आसा. 21 खेपे हे पंगड एकामेका आड खेळ्ळ्यात.
मजगतीं, दोनूय पंगडां मदीं वट्ट 166 मॅची जाल्यात, तातूंतल्यो 97 मॅची जिखल्यात, जाल्यार 57 मॅचींनी हार घेवची पडल्या. आयची मॅच फकत भारत आनी श्रीलंका ह्या पंगडां मदीं न्हय जाल्यार सर्वोत्कृश्ट बॅट्समन आनी बॉलर हांचे मदीं जातली. शुभमन गिल (275), कुशल मॅण्डिस (253) आनी सदीरा समराविक्रमा (215) हे सर्तींतले तीन सर्वोत्कृश्ट बॅट्समन आसात, जाल्यार सर्तींतल्या सर्वोत्कृश्ट चारांतले तीन बॉलर हे मथीशा पथिराना, दुनिथ वेल्लालगे आनी कुलदीप यादव आसा. तांणी वळेरेन 11,10 आनी 9 विकेटी घेतल्यात. सर्तींतलो उत्कृश्ट बॅट्समन आनी बॉलर कोण थारता हाचेर सगल्यांची नदर आसतली.
रोहित शर्मा आनी शुभमन गिल हे जोडयेन हालींसाराक बरें प्रदर्शन केलां. 2022 सावन आतां मेरेन हे जोडयेन 13 वन डे मॅचींनी 87.3चे सरासरीन 1048 धांवड्यो केल्यात. तशेंच 13 डावांनी चार खेपे शेंकड्यांच्यो भागिदाऱ्यो केल्यात.
कोहलीक श्रीलंकेंत खेळपाक आवडटा. पूण, दावखुरो स्पिनर वेल्लालगे आड सादूर रावपाची गरज आसा. फाटले मॅचींत ताणें कोहलीक तीन धांवड्यांचेर बाद केल्लो. हालींसाराक दावखुऱ्या स्पिनरां आड खेळटना कोहली धडपडटा. 2022 सावन अजून मेरेन तो आठ खेपे स्पिनरां आड बाद जाला. शमार ब्रुक्सान सगल्यांत चड 9 खेपे बाद केला. अशा बॉलरां आड कोहली फकत 13चे सरासरीन धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
