एलियन्सांचे पुरावे नात, पूण ते आसूं येतात : नासा
भांगरभूंय | प्रतिनिधी
न्यूयाॅर्क, खबरां संस्था : नासान यूएफओ पळोवपा संबंदीत घडणुकां विशीं अहवाल जाहीर केला. यूएफओ संबंदीत घडणुकांनी एलियन्सांचो आस्पाव आशिल्ल्याचे पुरावे मेळूंक नात. पूण, ही शक्यताय नासान न्हयकारूंक ना. परकी आनी यूएफओ हांची चवकशी करपा खातीर नासान नव्या संशोधन संचालकाची नेमणूक केल्या.
‘न्यूयॉर्क टायम्सा’चे खबरे प्रमाण, नासा खातीर संरक्षण खात्या वांगडा यूएफओचेर काम करपी मार्क मॅकिनर्नी हांकां हें काम दिलां. हें संशोधन कशें जातलें तें अजून उक्तें जावंक ना, पूण नासा हाचे खातीर प्रगत तंत्रगिन्यान आनी एआय वापरपाचो विचार करता. नासा ह्या संशोधनाचे फुडारपण करची ना अशें नासाचे प्रशासक बिल नेल्सन हांणी सांगलें. पूण ताचे अहवाल आनी तपशील वांटपाक पयलीं परस चड पारदर्शकता आसतली. 36 पानांच्या यूएफओ अहवालांत नासान धर्तरेच्या वातावरणांत परकी तंत्रगिन्यानाची शक्यताय उक्तायल्या.
नासाच्या विज्ञान मिशन संचालनालयाची सहाय्यक प्रशासक निकोल फॉक्स हांणी सांगलें, यूएपी/ यूएफओ हें आमचें धर्तरेचेर आशिल्लें एक व्हडलें गूढ. हाचें मुखेल कारण म्हणल्यार हाचे संबंदीं आमचे कडेन फावो तो डेटा ना. आतां यूएफओ संशोधनाचे नवे संचालक एआय तंत्रज्ञान आनी मशीन लर्निंग वापरून डेटा एकठांय करतले.
मेक्सिकोंतल्यो कुडी
मेक्सिकोंत मेळिल्ल्या कथित कुडीं विशीं विचारलें तेन्ना नासाच्या एका शास्त्रज्ञान बीबीसीक सांगलें – जर तें खरें आसत जाल्यार संवसारभरांतल्या शास्त्रज्ञांनी ताचे नमुने घेवपाक जाय. मागीर चवकशेच्या निकाला उपरांत परिस्थिती स्पश्ट जातली. खरें म्हणल्यार 12 सप्टेंबराक मेक्सिकन संसदेंत एलियन्सांचे हाजिरेचेर चर्चाय जाल्ली. ह्या वेळार दोन कुडीय दाखयिल्ल्यो.
ह्यो कुडी एलियन्सांच्यो अशें म्हण्टात. मेक्सिकन पत्रकार आनी युफोलॉजिस्ट जेमे मॉसन हांणी सांगलें, पेरूंतले एके खणींत त्यो मेळ्ळ्यात, जी एक हजार वर्सां परस चड पोरणी आसा. संसदेंतल्यान ही कार्यावळ थेट प्रसारीत जाली. ‘ममी’ केल्ल्या एलियन्सांचीं मडीं लांकडी पेटयेंत दवरताले. ताचो व्हिडियोय प्रदर्शीत जालो.
अमेरिकेच्या नौदलाचो आदलो पायलट रायन ग्रेव्हस लेगीत हे सुनावणेक हाजीर आशिल्लो. ग्रेव्हसान स्वता अमेरिकेच्या काँग्रेसी मुखार दावो केलो की ताणें आपल्या सेवेच्या काळांत परगिऱ्या वयलें अंतरिक्षयान पळयलां.
द गार्डियनाच्या मतान, मेजर ग्रुश 2022 वर्साच्या निमाणे मेरेन अमेरिकेच्या संरक्षण एजन्सी खातीर यूएपी (दुबावीत यूएफओ घडणुको) चें विश्लेशण करतालो. सुनावणेंत ताणें सांगिल्लें की सरकारान एलियन्साचो सोद लायला आनी तांच्या अंतरिक्ष यानांचेर गुप्त संशोधन करता. 1930 वर्सा एक अंतरिक्षयान दुसऱ्या ग्रहाचेर पडलें असोय दावो ग्रुश हाणें संसदेंत केलो. ताचे वांगडा एक कूडय आशिल्ली, ती मनशाची न्हय. ही म्हायती ताका हे कार्यावळींत थेट वांटो घेवपी अमेरिकन अधिकाऱ्यां वरवीं मेळ्ळी अशें ताणें सांगिल्लें.
अमेरिकेन यूएफओ पळोवपाचें मान्य केलें
2020 वर्सा यूएफओची चवकशी करपा खातीर स्थापन केल्ल्या अमेरिकन कार्यदळान अहवाल जाहीर केलो. अमेरिकेच्या सरकाराच्या सुत्रांनी 2004 ते 2021 ह्या काळांत 144 युएफओ पळोवपा विशींचो 9 पानांचो अहवाल दिला. पॅन्टागन तांकां अज्ञात हवाई घडणुको वा यूएपी अशें म्हणटा.
मजेची गजाल म्हळ्यार ह्या अहवालांत यूएफओ दिसपाची खात्री दिवंक ना आनी न्हयकारय दिवंक ना. अशीं वस्तू धर्तरेचेर एलियन्साच्या आगमनाची लक्षणां आसूं येतात अशें निश्चीतपणान सांगिल्लें. 1947 ते 1969 मेरेन अमेरिकेच्या वायुसेनेन प्रॉजेक्ट ब्लू बुक नांवाची चवकशी कारवाय चलयली. वट्ट 12,618 अहवालांची तपासणी करून तीं सामान्य घडणुको आशिल्ल्याचें दिसून आयलें. 2007 ते 2012 ह्या काळांत प्रगत एरोस्पेस धोक्याची वळख कार्यावळ (एएटीआयपी) सुरू जाली. उपरांत ही कार्यावळ बंद जाली. ह्या सगळ्या प्रकल्पांचे अहवाल गुपीत दवरले. 2020 वर्सा अज्ञात हवाई घडणुको कार्यदळ नांवाची कार्यावळ चालीक लायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
