भांगरभूंय | प्रतिनिधी
बंगळूरु, खबरां संस्था ः कर्नाटक उच्च न्यायालयान ‘आज तक’ हे नामनेच्या खबरां चॅनलाचे सल्लागार संपादक सुधीर चौधरी हांकां अटक करची न्हय असो आदेश दिला. पूण तेच बरोबर चौधरी हांचे आड दाखल केल्लो एफआयआर स्थगीत करचो, ही मागणी न्यायालयान न्हयकारली. चौधरी हांचे आड गुन्यांव नोंद करूं येता आनी ह्या प्रकरणाची चवकशी करपाची गरज आसा अशें उच्च न्यायालयान स्पश्ट केलां.
कर्नाटक अल्पसंख्यांक उदरगत म्हामंडळान दाखल केल्ल्या एफआयआराक आव्हान दिवपी चौधरी हांचे याचिकेचेर फुडली सुनावणी 20 सप्टेंबराक जातली. तो मेरेन तांकां ताब्यांत घेवन चवकशी करची न्हय अशें निर्देश न्या. हेमंत चंदनगौडर हांच्या एक वांगडी खंडपिठान दिले.
एफआयआर कित्याक?
सुधीर चौधरी हांणी आपले एके कार्यावळींत कर्नाटक सरकाराच्या अल्पसंख्यांक उदरगत म्हामंडळाच्या अल्पसंख्यांकांच्या येवजणेचेर टिका केल्ली. कर्नाटकांत फकत मुसलमानांक फायदो जावपी येवजण आसा, जाल्यार भोवसंख्य हिंदूंक तिचो मात पसून फायदो मेळना, असो आरोप तांणी केल्लो. कर्नाटकांत वेगवेगळ्या समाजा खातीर वेगवेगळ्यो येवजण्यो आसात. हिंदू समाजांतल्या घटकां खातीर वेगळ्यो येवजण्यो आसात, अशें राज्य सरकारान उक्तें केलें. हाचे उपरांत चौधरी तशेंच ‘आजतक’ चॅनलाच्या संपादका आड म्हामंडळान कागाळ केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
