शुभमन गिलाचो शेंकडो फुकट

भांगरभूंय | प्रतिनिधी

भारताक आशिया करंड क्रिकेट सर्तीचे निमाणे सुपर चारांतले मॅचींत बांगलादेशा कडल्यान 6 धांवड्यांनी हार घेवची पडली. मॅच निमाणे ओव्हरी मेरेन रंगली. बांगलादेशान 2012 उपरांत हे सर्तींत भारता आड पयलें जैत जोडलें.

बांगलादेशान पयलीं बॅटींग करतना निर्धारीत 50 ओव्हरींनी 8 विकेटी वगडावन 265 धांवड्यो केल्यो. ताचो फाटलाव करपी भारताचो डाव 49.5 ओव्हरींनी 259चेर सोंपलो.

बांगलादेशाच्या बॉलरां मुखार भारताचे हेर बॅट्समन बाद जावन तंबूंत वताले. पूण, युवा बॅट्समन शुभमन गिलान आकर्शक शेंकडो मारलो. ताणें 121 धांवड्यांची खेळी केली. ताच्या उपरांत दावखुरो बॅट्समन अक्षर पटेलान डाव सांबाळ्ळो. पूण, मुस्तफिजूर रहमानान 49वे ओव्हरींत दोन धपके दीत मॅच बांगलादेशा वटेन घुंवडायली.

रोहित शर्मा (0), तिलक वर्मा (5), इशान किशन (5) बाद जाल्या उपरांत लोकेश राहुल आनी शुभमन गिल हांणी 87 बॉलांनी 57 धांवड्यांची भागिदारी केली. मेहदी हसनान ही जोडी फोडली. ताणें राहुलाक (19) बाद केलो. ते उपरांत सुर्यकुमार यादव (26) आनी गिल हाणें 45 धांवड्यांची भागिदारी केली. सुर्या बाद जाल्या उपरांत रवींद्र जडेजा (7) धांवड्यो करून मुस्ताफिजूर रहमानाच्या बॉलाचेर बाद जालो.

गिल बाद जाल्या उपरांत अक्षरान सगलीं सुत्रां आपल्या हातांत घेतली. ताका शार्दुल ठाकूरान बरी साथ दिली. मुस्ताफिजूरान 49वे ओव्हरींत शार्दुलाक बाद केलो. ते उपरांत अक्षर लेगीत तंबूंत परतलो. निमाणे ओव्हरींत भारताक जैता खातीर 12 धांवड्यांची गरज आशिल्ली. पूण, फकत एकूच विकेट बाकी आशिल्ली. मोहम्मद शमीन चवथ्या बॉलाचेर चवको मारलो. ताका लागून दोन बॉलांनी आठ धांवड्यो अशें समीकरण जालें. पांचव्या बॉलाचेर शमी दोन धांवड्यो घेवपाच्या यत्नांत धांवबाद जालो आनी भारताचो डाव 259चेर सोंपलो.