भांगरभूंय | प्रतिनिधी
1 ऑक्टोबर सावन नवे नेम, पावसाळी अधिवेशनांत विधेयक संमत
नवी दिल्ली, खबरां संस्था ः येता त्या 1 ऑक्टोबरा सावन दस्तावेज सत्यापनांत (खरें काय फट तें तपासप) जल्म प्रमाणपत्राचें म्हत्व वाडटलें. नव्या नेमा प्रमाण शाळेंत प्रवेश, वाहन चालक परवानो, मतदार वळख पत्र, लग्न नोंदणी, सरकारी नोकरी, पासपोर्ट, आनी आधार कार्ड सयत साबार कामां खातीर जल्म प्रमाणपत्र एकूच दस्तावेज म्हणून वापरूं येता.
पावसाळी अधिवेशनांत संसदेच्या दोनूय सभाघरांनी जल्म आनी मरण नोंदणी (दुरुस्ती) विधेयक 2023 मंजूर जालीं. ताका राष्ट्रपतीचीय संमती मेळ्ळ्या. मूळ कायद्यांत सुरवाती सावन दुरुस्ती जावंक ना अशें अधिवेशनांत केंद्रीय गृह राज्यमंत्री नित्यानंद राय हांणी लोकसभेत सांगिल्लें. आतां समाजीक बदल आनी तंत्रीक उदरगती कडेन जुळोवन घेवपाची गरज आसा आनी ती चड नागरिकां खातीर अनुकूल करपाची गरज आसा. नव्या कायद्या उपरांत मनशाची पिराय आनी जल्मसुवात सिध्द करपा खातीर ते वैध प्रमाणपत्र मानतले. हाका लागून देशांत तुमची जल्म तारीख आनी जल्म सुवात सिद्द करपा खातीर जायते कागदपत्र दाखोवचे पडचे नात.
जल्म- मरण प्रमाणपत्राची प्रक्रिया ऑनलायन
कायद्यांत जाल्ले दुरुस्तीक लागून सगळ्यांत व्हडलो बदल म्हळ्यार जल्म आनी मरण प्रमाणपत्राची पुराय प्रक्रिया ऑनलायन जातली. पयलीं फकत ताची हार्ड कॉपी मेळटाली. ह्या विधेयकांत जल्म आनी मरण हांची केंद्रीकृत पोर्टलाचेर नोंदणी करपाची तरतूद आसा.
प्रमाणपत्र आधार कार्डा भशेन वापरतले?
आतां मेरेन आधार कार्ड सगळे कडेन वळखपत्र म्हणून वापरताले आनी हेर दर एका दस्तावेजा कडेन आनी खात्या कडेन ते जोडचें पडटालें. तेच प्रमाण जल्म-मरण प्रमाणपत्र आसतलें, जें जल्म-मरणाच्या पुराव्या खातीर सगळे कडेन वळखपत्र म्हणून स्विकारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
