भांगरभूंय | प्रतिनिधी
भारताचो दावखुरो फास्ट बॉलर जयदेव उनाडकटान कावण्टी क्रिकेटींत जबरदस्त प्रदर्शन केलें. ताणें एके मॅचींत णव विकेटी घेतल्यो. कावण्टी क्रिकेटींत ससॅक्सा वतीन खेळटना लिस्टरशायरा आड जयदेवान ही कामगिरी केली. ताच्या प्रदर्शना नेटार ससॅक्सान 15 धांवड्यांनी मॅच जिखली.
लीस्टरशायराची मॅचीचेर शेक दवरिल्लो. पूण, उनाडकटान प्रतिस्पर्धी पंगडाच्या निमाण्या चार बॅट्समनांक 30 धांवड्यां भितर बाद करून लीस्टरशायराच्या हातांतली मॅच काडून घेतली.
ससॅक्सान लीस्टरशायरा मुखार जैता खातीर 499 धांवड्यांची मोख दवरिल्ली. लीस्टरशायरान 6 विकेटी वगडावन 450 धांवड्यां मेरेन मजल मारिल्ली. पूण, ते उपरांत उनाडकटान आपल्या स्पेलांत 30 धांवड्यो दीत उरिल्ल्यो चार विकेटी घेतल्यो.
पयल्या डावांत ताणें 12.4 ओव्हरींनी 23 धांवड्यो दिवन 3 विकेटी घेतिल्ल्यो. दुसऱ्या डावांत 32.4 ओव्हरींनी 94 धांवड्यो दिवन 6 विकेटी घेतल्यो. उनाडकटा खेरीत जॅक कर्सन आनी कार्वेलस हाणें दरेकी 2 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
