भांगरभूंय | प्रतिनिधी
नवी दिल्ली, खबरां संस्था : ‘जी-20’ शिखर बसके उपरांत आतां केंद्र सरकारान फुडल्या सप्तकांत जावपी संसदेच्या खाशेल्या अधिवेशनाचेर लक्ष दिवपाक सुरवात केल्या. ह्या अधिवेशनाच्या आदल्या दिसा 17 सप्टेंबराक सर्वपक्षीय बसका आपयल्या आनी त्याच दिसा नव्या संसद इमारतीचेर तिरंगो हुबयतले. प्रधानमंत्री नरेंद्र मोदी हांचो वाडदीस ह्याच दिसा आसा.
केंद्र सरकारान 18 सप्टेंबर सावन पांच दिसांचें खाशेलें अधिवेशन आपयलां. हे फाटभुंयेर आयतारा सांजवेळार साडे चार वरांचेर संरक्षण मंत्री आनी लोकसभा उप फुडारी राजनाथ सिंग हांचे अध्यक्षते खाला सर्वपक्षीय बसका आपयल्या. अधिवेशनांत प्रस्न-जाप काळ, शून्य काळ आसचो ना तशेंच खाजगी विधेयकूय मांडचे नात अशें सरकारान पयलींच स्पश्ट केलां.
सर्वपक्षीय बसके वांगडाच आयतारा पयलेच खेपे नव्या संसद इमारतीचेर राष्ट्रीय बावटो हुबयतले. मोदी वांगडा लोकसभा अध्यक्ष ओम बिर्ला, राज्यसभा अध्यक्ष जगदीश धनकार ह्या बावटो हुबोवपाच्या सुवाळ्याक हाजीर आसतले तशेंच सगल्या पक्षांच्या गट फुडार्यांक आपयल्यात. अधिवेशनाच्या पयल्या दिसा कार्यवाय पोरण्या संसद इमारतींत जातली आनी दुसर्या दिसा म्हळ्यार 19 तारखेक चवथी निमतान कार्यवाय नवे इमारतींत व्हरपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
