भांगरभूंय | प्रतिनिधी
चीनाच्या हांगझाऊ शारांत 23 सप्टेंबर ते 8 ऑक्टोबर मेरेन चलपी आशियायी खेळां सर्तींत भारताचो दुबळो फुटबॉल पंगड खेळटलो. दिग्गज खेळगडे सुनील छेत्री, डिफॅण्डर संदेश झिंगन आनी गोलकीपर गुरप्रीत सिंग संधू ह्या अणभवी खेळगड्यांक भारता वतीन खेळपाक मेळचे ना.
इंडियन सुपर लिगेंतल्या (आयएसएल) क्लबांनी आशियायी खेळांत खेळपाक परवानगी दिवंक ना. अखील भारतीय फुटबॉल संघटनेन आशियायी खेळां सर्ती खातीर उसरां पंगड वेंचलो. भारतीय ऑलिम्पीक संघटनेन आशियायी सर्तीच्या आयोजकांक उसरा पंगड धाडपाची परवानगी मागिल्ली. आयोजकांनी हा मागणी मान्य केली. ते उपरांत फुटबॉल पंगडाची निवड केली. ह्या पंगडांत सुनील छेत्री, संदेश झिंगन आनी गुरप्रीत सिंग संधू हांचो आस्पाव आशिल्लो.
आशियायी खेळां सर्त 23 सप्टेंबरा सावन सुरू जातली, जाल्यार भारतांत आयएसएलाक 21 सप्टेबरा सावन सुरवात जातली. दोनूय सर्ती एकाच वेळार जावपाच्यो आशिल्ल्यान आडखळ निर्माण जाली. भारतीय फुटबॉल संघटनेचे कार्यकारी समितीन हाचेर उपाय काडपाक एक बसका लेगीत आपयिल्ली. पूण आयएसएलाचे क्लब खेळगड्यांक मेकळे करपाक तयार ना. फिफाच्या आंतरराष्ट्रीय वेळापत्रतांत आशियायी खेळां सर्तीचो आस्पाव ना. ताका लागून आमी खेळगड्यांक आशियायी खेळां सर्ती खातीर मेकळे करपाक शकनात अशें आयएसलाच्या क्लबांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
