भांगरभूंय | प्रतिनिधी
श्रा वण म्हयनो हो हिंदूंचो पवीत्र म्हयनो. ह्या म्हयन्यात गोंयच्या तशेंच गोंय भायल्या देवळानीं थारायिल्ल्या वारां प्रमाण भक्तगण व्हडा उमेदीन उत्सव मनयतात. सोमाराक म्हादेवाच्या देवळांत, मंगळाराक गणपतीच्या देवळांत, ब्रेस्ताराक दत्ताच्या देवळांत, शुक्राराक लक्ष्मीच्या, शेनवाराक मारुती आनी इतर. दरेका देवळांत वेगळी वेगळी परंपरा. पिळग्यान पिळग्यो चलून आयिल्ल्या रिती नुसार हे उत्सव मनयतात. भजन, आरती, पूजा, म्हानैवेद्य हे सगळे उपक्रम देवळांत घडोवन हाडटात. व्हडा संख्येन भक्तगण ह्या उत्सवाक जाता तशे दान दितात.
आमच्या केप्यां वाठारांत जांबावले ह्या सैमसुंदर गावांत श्री दामबाबालें देवूळ आसा. पुराय गोंयांत तशेंच गोंयां भायर खूबच फामाद अशें हें देवूळ. जांबावलेचो शिगमो म्हणजे गुलाल हो सगळ्यांकच खबर आसतलो. त्या भायर श्रावणांत जांबावले जावपी उत्सव आनी अन्नदान (म्हानैवेद्य) होवूय तितलोच फामाद.
श्रावण सुरू जातकच पयल्या सोमाराक धरुन हो म्हानैवेद्य सुरू जाता. सोमारा – सोमारा श्री दामबाबाली पालखी आसता. पालखे पैलीं भजन, संगीताचे कार्यक्रम जातात. सोमाराक रातीचें म्हणजे साडेसांताक म्हानैवेद्य सुरू जाता. त्या दिसा तो दनपरां आसना. बाकिच्या दिसांनी दनपरां 12.30 जाता. दिसाक सुमारे तीन हजार भक्तगण हो म्हानैवेद्य घेतात. ही परंपरा कितलीशींच वर्सां जालीं… चालूच आसा.
वदनी कवळ घेता नाम
घ्या श्री हरीचे
सहज हवन होते
नाम घेता फुकाचे
जीवन करी जीवित्वा
अन्न हे पूर्ण ब्रह्म
उदर भरण नोहे
जाणिजे यज्ञ कर्म…
अन्न ग्रहण करचे पयलीं हो श्लोक म्हणचो अशें पूर्वजांनी सांगिल्ले. जेवण रांदतनाय रांदता त्या त्या मनशाचे विचार पवित्र आसचे. देवाचे नाव घेवन रांदल्यार जेवण सुरबूस जाता आनी जेवतल्याकूय तें घोस्ताचें वता.
जांबावलेचें जेवण रांदपी कितल्या वर्सां सावन जेवण रांदतात. जेवणाची रूच अजून तशीच आसा. सुरबूस. जेवणाक पदार्थ म्हणजे गलगलीत मूग, खतखतीत खतखतें, फळफळीत शीत, गरमा गरम सार, रोस आनी शेवटाक बियो पासां घालून केल्लो दुधाचो सरसरीत
पायस वा मणगणें. केन्ना उड्डमेथी, वडे.
हें देवाले जेवण इतलें रुचीक की जेवतल्याक पत्रावळीर सांडपाक वायट दिसुकूंच जाय. सुरवातेक वाडपी, मूग, खतखतें, शीत, रोस व्यवस्थित वाडटात. परत फाटले फुडलें वाडपाक येतात. दामबाबाले जेवण कोणाकूच कमी पडचें न्हय आनी पोट भरून भक्तगण तृप्त जावचे होच तांचो हेतू. ह्या एकाच विचारान दामबाबालें जेवण वर्सान वर्स श्रावण म्हयन्यात चालूच आसता.
ह्या म्हाप्रसादाचो आस्वाद घेवपाक गावचो आनी सरभोंवतणच्या गांवचो लोक व्हडा संख्येन येतात. तशेंच गोंयच्या हेर वाठारांतलोय लोक येतात. कर्नाटक सावन महाजन, भक्तगण येतात आनी दामबाबालें जेवण जेवतात. लागीच्या शाळांतलीं भुरगींय शाळा सुट्टकच शिस्तीन आनी उमेदीन येतात. सगळे लोक कसलीच गडबड करिनासतना म्हानैवेद्य घेतात. दिसाक जवळ जवळ अगरसाळींत चार तरी पंगती जाताच. वाडपीय सगळे माये मोगान वावर करतात. जेवण जातकच दोवलो भर दुधाचो पायस पानार वाडटकच भुरकावन खावपाक वेगळोच आनंद येता. सगळ्यांचें जेवण जातकच मायकार वाडपी देवाची प्रार्थना करता.
ज्या ज्या जाग्यार मन वतां म्हजें
त्या त्या जाग्यार दिसता रूप तुजें
हांव जेवता हें जेवण देवाचे
सदांच तोंडान घेवचें
नाव दामोदराचें…
म्हणात पार्वती पते हर हर हर महादेव…
अशें म्हणीत तृप्त जावन पंगत उठटा. एक पंगत वयार जावपाक सुमारे १५ मिनटा लागता. पंगत उठून हात धुवपाक भायल्या वटेन वता म्हणसर हेवटेन पटपटीत पत्रावळी काडून सगळें पुसून निवळ करतात आनी मागीर दुसरी पंगत भितर घेतात. पुराय म्हयनो हो येदो व्हडलो उपक्रम दामबाब सहज तरेन आपल्या भक्तगण, म्हाजनां कडल्यान करून घेता.
आमी व्हडल्या -व्हडल्या हॉटेलांत वचून वेगळ्या -वेगळ्या पक्वान्नाचो आस्वाद घेतात. पांचशें ते देड हजार सहज मोडतात. पूण देवळातलें पवीत्र जेवण चुकयतात. तें मागीर खंयच्याय देवळातलें आसू. तें सात्विक जेवण. आमच्या शरीराक ताची चड गरज आसता. मुद्दाम श्रावणात जांबावले येवून दामबाबालें दर्शन घेयात. आनी ह्या महाप्रसादाचो आस्वादूय. पानार वाडिल्ले तितलेंय पुसून जेवपाक मात विसरूं नाकात.
म्हणात रामनाथ दामोदर महाराज की जय।
अंबेश जयकृष्ण तळवडकार
9763328585
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
