आत्मसोद – खऱ्या यशाची परिभाशा

भांगरभूंय | प्रतिनिधी

म्हाका खात्री आसा हें पुस्तक वाचतगीर आमची समाजांतले प्रश्नांकडेन पळोवपाची नजर बदलतली आनी दरेकलो प्रॉब्लेम क्रिएटर न्हय तर प्रॉब्लेम सॉल्व्हर जातलो.

एक गजाल वाचली आनी मनाक खूब दुख्ख जालें. एके सरकारी नोकरेक हजारांनी
लोकांची गर्दीं पड्डिली. सरकारी नोकरी तिय बी तात्पुरत्या काळा खातीर. अशे नोकरेक उच्च शिक्षीत भुरगे मुलाखतीक एकठांय येवप हाची सारकी वायट परिस्थिती ना. ह्याच वेळार म्हाका उगडास आयलो तो शिक्षक अनंत अग्नी हांणी बरयिल्ले “आत्मसोद” ह्या पुस्तकाचो. हें पुस्तक उजवाडायल्लें 14 डिसेंबर 2022 ह्या दिसा. खऱ्यांनीच लेखकाक हो गोंयचो फुडार दिशिल्लो काय ? आयज जेन्ना अश्यो गजालीं घडतना दिसतात, तेन्ना हो विचार आपसूकच येता.
“आत्मसोद” पुस्तका विशीं, अनंत अग्नी हांचे बद्दल सांगप म्हणल्यार म्हज्या सारख्यान सुर्याक दिवो दाखोवप. चार दशकांचो शिक्षणीक अणभव तशेंच उच्च शिक्षण हाचो संगम रवींद्र केळेकार ज्ञानमंदिर ह्या मडगांव शारांतल्या शाळेचे मुख्याध्यापक म्हळ्यार लेखक अनंत अग्नी.
ह्या पुस्तकांत तांणी आपलें अणभव व्यक्त केल्यात. तशेंच आयचे घडयेक तें कशें आमकां उपेगी आसात हें मांडलां. आयज आमची भुरगीं नवे शैक्षणीक धोरणाच्या हुमऱ्यार आसात. हो हुमरो भुरगींच न्हय तर पालक वर्गय हुपपाचो आसा. अश्या वेळार “आत्मसोद” एक मार्गदर्शकाची भुमिका घेता. तशेंच आतांचो काळ म्हळ्यार “स्टार्टअप ” काळ. अश्या वेळार भुरग्यांक मानसीक बळाची गरज असता तें बळ “आत्मसोद” दिता. पुस्तकांतले लेख, एक- एक विशय सामको सोंपो करून भुरग्यांक तशेंच पालकांक समजायता.
“परिक्षा म्हणल्यार प्लेजर प्रेशर न्हय ” हो लेख आयच्या घडयेक सामको ज्यूस्त. आयज परिक्षा म्हणलें कि भुरगीं सामकी तकलेर ताण घेतात. जर एकाद्या घरांत धावी वा बारावी परिक्षेंत बसपी भुरगें आसत जाल्यार विचारुंकूच नाका. पुरार वर्स घरा कर्फ्यूमय वातावरण आसता. भुरग्यां परस चड प्रेशर पालक घेतात आनी तोच आपल्या भुरग्यांचेर दितात. ह्या लेखांत लेखकान हो विशय सामको सोंपो करून मांडला. ते म्हणटात परिक्षा ही आमी उत्सव म्हूण पळोवपाक जाय. जशे उत्सवा वेळार सगळे कशे आनंदीत वातावरण आसता, ते भशेन परिक्षेचो काळ आमी करपाक जाय. घरा उत्सव आसल्यार भुरगीं रुचीन भाग घेतात. तीच जिद्द तांणी परिक्षे वेळार दाखोवचो उपाय लेखकान हांगा सांगला. ज्या घरांत धावी आनी बारावीची भुरगीं आसात तांणी हें पुस्तक मुजरत वाच्चें.
दुसरो विशय म्हळ्यार नोकरी. आयज नोकरी मेळप हें एक दिव्य जाल्लें आसा. तातूंत सरकारी नोकरी तर सामान्य मनश्यान मेळपाची आस धरचीच न्हय. “जॉब सीकर न्हय.. जॉब गिव्हर जावया ” ह्या लेखाचो हांव हांगा मुद्दम उल्लेख करता. आयची परिस्थिती, नोकऱ्यो कमी आनी मनीसबळ चड. दर एकल्यान समजुपाची गरज आसा, जो मेरेन नवे वेवसाय तयार जावपाना, ते मेरेन नव्यो नोकऱ्यो तयार जावपाना. आमच्या राज्यांत चडशे वेवसाय परप्रांतीय करतात आनी आपलेच लोक कामाक दवरतात. खुबशे पारंपारिक वेवसाय आयज गोंयां भायलो लोक येवन करूंक लागल्यांत. गरज आसा ती आमच्या तरणाट्यां मदीं उद्योजक जावपाक प्रेरित करपाची. तांचे भितर एक ज्योत पेटोवपाची. आपली क्षमता कितें हाची तांका जाणीव करून दिवपाची. “जॉब सीकर न्हय.. जॉब गिव्हर जावया “हो लेख आयच्या भाशेंत सांगपाचे जालें तर मोटिवेशन दिवपाचें काम करता. कोणूय जर धंदो करूंक सोदता तर भांडवला परस ताका गरज आसता ती तेंक्याची. हो लेख पालकांनी सुद्धा वाचपाक जाय जाणें करून पालक आपल्या भुरग्यांक नोकरी सोदपी करिनासताना नोकरी दिवपी करपाचेर चड भर दितले.
मोबायल हो एक समाजाक लागिल्ली कीड. आमी खूब कडेन पळयतात पालक आपल्या भुरग्यांक ओगी करपाक मोबायलाचेर कार्टून लावन दितात. ह्या पुस्तकांत उदाहरणा सैत हाचें वायट परिणाम लेखकान मांडल्यात. तशेंच मनीसपण ,एकमेकां कडेन सर्त, परीक्षेंत नक्कल करप अशे कितलेशेच विशय ह्या पुस्तकांत मांडल्यात.
हें पुस्तक दर ऐकल्या भुरग्यांक, पालकांक खास करून जे पालक जावपाचे आसात तांका एकदम गरजेचे. म्हाका खात्री आसा हें पुस्तक वाचतगीर आमची समाजांतले प्रश्नांकडेन पळोवपाची नजर बदलतली आनी दरेकलो प्रॉब्लेम क्रिएटर न्हय तर प्रॉब्लेम सॉल्व्हर जातलो.

भुषण शिरवयकार
9921347730