उफेवपी घर

भांगरभूंय | प्रतिनिधी

गरज ही सोदाची जननी अशें म्हणटात. बिहाराच्या आरा वाठारांत रावपी प्रशांत कुमार हाणें दर वर्सां हुंवाराक फुडो करपी लोकांक थाकाय दिवचे खातीर बक्सरांत गंगा न्हंयेदेगेर पयलें उफेवपी घर तयार केलां. दर वर्सा बिहाराचो चडसो भाग हुवारांत बुडटा. त्या वेळार लोक थंयच्यान जीव घेवन वतात. हुवार गेले उपरांत जेन्ना ते परतून येतात तेन्ना थंय कांयच आसना, घर लेगीत. हाचेर प्रशांत कुमारान एक उपाय काडला. ताणें अशें एक घर बांदला, जें उदकार उफेंता.हुवार गेले उपरांत लोक सुसेगातीन येवन आपल्या घरांत रावपाक शकतात.
प्रशांत कुमारान म्हणलां, दर वर्सा बिहारांतल्या चडशा लोकांक हुवारक फुडो करचो पडटा. चडशा लोकांक आपलें घरदार सोडून वच्चें पडटा. ते दर वर्सा 3-4 म्हयने आपल्या घरादारा पासून पयस उरतात. ताका लागून हुवाराच्या काळांत फायद्याक पडूं येता अशा घराचो विचार तकलेंत आयलो. लोकांक थाकाय दिवचे खातीर आमी अशीं कितलीशींच घरां तयार करपाक शकतात. परंपरीक आनी सैमीक पद्दतींचो उपेग करून हुवाराचे समस्येचेर जैत जोडपाचो यत्न केला.
हो एक सवाय भितर घर तयार करपाचो यत्न आसा. आपूण एक प्रोटोटायप घर तयार करता. तातूंत तीन कुडी आनी एक बाथरूम आसतलो. ताका सुमार 6 लाख रुपया खर्च येतलो. येता त्या एक- दोन वर्सांत आपली मोख पुराय जातली. हें घर उदकांत बुडचें ना जाल्यार उफेंतलें. ह्या घरांत अन्नधान्य आनी जनावरांक आलाशिरो दिवपाक सुवात आसतली, अशें प्रशांत कुमारान सांगलें.
2019त आयिल्ल्या भिरांकूळ हुवारा उपरांत अशें हुवार प्रतिबंधक घर तयार करपाचो विचार आयिल्लो. कृतपुराच्या घाट गंगेंत उफेंता तसलें घर बांदपाचें काम सुरू जालां. तें एका म्हयन्या भितर तयार जातलें. हें घर तयार करचे खातीर गायेचें शेण, माती आनी भुशा वांगडा पेंटाचे, इंजीन तेलाचे रिते डबे हे सारकिल्ल्या सामुग्रीचो वापर करतात. घराच्या वण्टींक जोडपाक आनी घटसाणी खातीर लोखंडाच्या एंगलांचो वापर केला, अशें प्रशांत कुमारान सांगलें.
2017त प्रशांत कुमारान मोटर सायकलीन भारत ते स्कॉटलॅण्ड प्रवास केला. ह्या काळांत तांणी साबार देशांची भोंवडी केली आनी कितल्योश्योच परंपरा पळयल्यो. कांय सुवातांचेर पिडेस्त नुस्तेंकार भावांची मजत करून साबार इश्ट जोडले, जे आतां ह्या प्रकल्पांत आदार करतात, अशीय म्हायती प्रशांत कुमार हांणी दिली.