भांगरभूंय | प्रतिनिधी
लोकांक सुशासन दिवपा खातीर तत्पर, कार्यक्षम आनी पारदर्शक सेवा दिवप अत्यंत म्हत्वाचें आसा. कोणूय सत्तेच्या
कारभाराचीं सुत्रां हातांत घेतले उपरांत सदांच सामान्य मनशाच्या भल्या खातीर काम करपाचो प्रयत्न करता हातूंत कसलोच दुबाव ना. आपल्या वावरांतल्यान राज्य आनी थंयच्या जनतेच्या हिता खातीर विवीध उपाय येवजण्यो सुरू करून अपेक्षीत लाव मेळोवन दिता.
वेंचून आयिल्ल्या लोकप्रतिनिधींनी जावं मागीर ते थळाव्या स्वराज्य संस्थांचे आसूं, विधानसभेचे वांगडी आसूं, संसद वांगडी आसूं तांणी आपल्यो आकांक्षा आनी अपेक्षा पूर्ण करच्यो, अशी लोकांची अपेक्षा आसता. पूण हे तेन्नाच पूर्ण जावपाक शकता जेन्ना लोकसेवक आपलें कर्तव्य आनी जापसालदारकी समजून जनतेची सेवा प्रभावीपणान आनी समर्पीत भावनेने करतलो.
ही गजाल लक्षांत घेवन मुख्यमंत्री डॉ. प्रमोद सावंत हांच्या फुडारपणा खालच्या सरकारान सरकारी अधिकाऱ्यांची कार्यक्षमता वाडोवपा खातीर दिशानिदेशन कार्यशाळा, प्रशिक्षण आनी हेर कार्यावळी नेमान आयोजीत करपाक सुरवात केल्या. संबंदीत अधिकाऱ्यांची कार्यक्षमता, तत्परता आनी कर्तव्य जबाबदारीचे भावनेंतल्यान लोकांच्या समस्यांचे निराकरण करप हो अशा उपक्रमांचो हेत आसा. तशेंच ‘सरकार तुमच्या दारांत’ उपक्रमा वरवीं सरकारी येवजण्यो लोकांच्या दारा मेरन पावोवन लोकांच्यो गरजो पूर्ण करप आनी लोकांक सरकारी खात्यांनी फावटी मारपा पसून थाकाय दिवपा खातीर सरकारान प्राधान्य दिलां. अशे तरेन सरकारान लोकहिताचे खूबशे उपक्रम येवजण्यो सुरू केल्यात. ‘सरकार तुमच्या दारांत’ उपक्रम येसस्वी करपा खातीर सरकारान गांवांगांवांनी स्वयंपूर्ण मित्रांची नेमणूक केल्या. स्वयंपूर्ण मित्रां वरवीं लोकांक सरकारी येवजण्यांची म्हायती करून दिवपा वांगडाच तांचो लाव घेवपाक सर्वसामान्य लोकांक मजत करतात. सरकारच्या स्वयंपूर्ण गोंय उपक्रमा वरवीं गोंयच्या लोकांक राज्य आनी केंद्र सरकारच्या येवजण्यांचो चडांत चड लाव मेळोवन दिवन लोकांक आत्मनिर्भर जावपाक प्रोत्साहन दिवप, हो ह्या उपक्रमाचो उद्देश आसा.
ग्रामीण वाठारांतल्या लोकांक सक्षम करपा खातीर गोंय सरकारान डिजिटल येवजणय सुरू केल्या. हे येवजणे वरवीं निवडक सरकारी सेवा लोकांच्या दारा मेरेन पावोवपाचो विचार आसा. ह्या उपक्रमाक लागून ग्रामीण मित्र आपलो वेळ आनी संसाधनाचो वापर वाटावंक शकता. तशेंच डिजिटल युगांत कोणूच फाटीं उरचो ना हाची खात्रीय करता.
सरकारी अधिकार्यांक सेर्वोत्तम आनी गोंय (वेळेच्या मर्यादेंत सेवा अधिकार) कायदो 2013 विशीं मार्गदर्शन करपा खातीर गोंय लोक प्रशासन आनी संशोधन विकास संस्थेन (GIPARD) प्रशासकी सुधारणा आनी भौशीक कागाळ खात्याच्या सहकार्यान हालींच एला फार्म, ओल्ड गोवा हांगा एका दिसाच्या प्रशिक्षण कार्यावळीचें आयोजन केल्लें. ह्या मार्गदर्शन कार्यावळींत मुखेल अशा सरकारी खात्यांचे 24 अधिकारी वांटेकार जाल्ले. अॅड. साव्हियो ट्रावासो, गोंय नागरी सेवेंतले निवृत्त अधिकारी अशोक देसाय, आदले जिल्हाेधिकारी एन. डी. अग्रवाल हांणी प्रशिक्षण कार्यावळ अधिकाऱ्यांक मार्गदर्शन केलें. म्हायती आनी प्रसिध्दी खात्या वतीन हांव ह्या प्रशिक्षण कार्यावळींत वांटेकार जाल्लों.
कार्यशाळेंत सेर्वोत्तम संकल्पनेंतल्यान गुणवत्ता वेवस्थापन, भौशीक कागाळींचें निराकरण, लोकांक सरकारी येवजण्यांची म्हायती दिवपा खातीर सरकारी खात्यांनी सिटीझन चार्टर तयार करप आनी हेर संबंदीत विशयांचेर मार्गदर्शन केलें.
भौशीक कागाळींचे वेळार निवारण करपा खातीर प्रत्येक सरकारी विभागांत भौशीक कागाळ अधिकाऱ्याची नेमणूक करप, सरकारी खात्यांनी सिटीझन चार्टर तयार करून प्रशासनांत कार्यक्षमताय आनी उत्कृश्टताय निर्माण करप हे विशींय
मार्गदर्शन जालें.
सरकारी अधिकाऱ्यांक आपले कर्तव्य प्रभावीपणान पार पाडपा खातीर तांची कार्यक्षमताय सुदारप, तांच्या ज्ञानांत भर घालप आनी तांची कुशळटाय वाडोवपाक अशा कार्यशाळांचें आयोजन करप ही काळाची गरज आसा.
प्रकाश नायक
9552974656
म्हायती अधिकारी, म्हायती आनी प्रसिद्धी खातें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
