‘घुमट हेरंब’ सिडीचें लोकार्पण
भांगरभूंय | प्रतिनिधी
गांवांतल्या कलाकारांक सोदून काडपाची गरज : जीत आरोलकार
पणजी, प्रतिनिधी: धारगळेच्या हेरंब आरती मंडळान हालींच ‘घुमट हेरंब’ हे सिडीचें लोकार्पण केलें. ह्या सुवाळ्याक मुखेल सोयरे म्हणून आमदार जीत आरोलकार हाजीर आशिल्ले. मानाचे सोयरे म्हणून मंडळाचे मार्गदर्शक सुरज पिंगे आनी अध्यक्ष अभिषेक मराठे हाजीर आशिल्ले. मानेस्तां हस्तुकीं हे सिडीचें लोकार्पण जालें.
ह्या वेळार आमदार आरोलकार हांणी पंगडाची तोखणाय करीत तांकां परबीं भेटयलीं. पेडणें म्हळ्यार कलाकारांची खाण. हे कलाकार गांवांगांवानी आशिल्ल्यान तांकां सोदून काडपाची गरज आसा. सरकारा वतीन आनी आपूण सगळे तरेचें सहकार्य करपाचो यत्न करतलों अशें म्हणून तरणाट्यांनी फुडले पिळगे मेरेन ही कला पावोवपाचो यत्न करचो असो उलो आरोलकार हांणी मारलो.
सुरज पिंगे हांणी हेरंब आरती मंडळाची सुरवात आनी ‘घुमट हेरंब’ सिडी काडपा मेरेनच्या प्रवासाची म्हायती दिली. अभिषेक मराठे हांणीय विचार मांडले.
हेरंब आरती मंडळाची सुरवात 2010 वर्सा जाली. 2013 त ह्या पंगडान सर्तींनी वांटो घेवपाक सुरवात केली. तांणी आतां मेरेन अखील गोंय पांवड्यार शंबरां वयर इनामां मेळयल्यांत. 2019 वर्साचें राजीव गांधी कला मंदीराचें अखील गोंय घुमट आरती सर्तीचें इनाम ह्या पंगडान आपल्या नांवार केलां. पंगडान चारश्यां वयर आरत्यो रचल्यात. सुभाष कामळकार आनी यशवंत नायक हांच्या मार्गदर्शना खाला ह्या पंगडान त्यो रचल्यात. 10 वर्सां खर मेहनती उपरांत अंदूं 8 सप्टेंबर दिसा पंगडान आपली पयली ‘घुमट हेरंभ’ ही सिडी काडली. पंगडांत मुखेल गायक ॐकार केरकार, जाल्यार कोरस गायक म्हणून सुभाष कामळकार, सनील पार्सेकार, यशवंत नायक, तशेंच घुमट वादक साईप्रसाद नायक, आदेश गडेकार, अनिकेत हळपे, दर्शन रेवडकार, जाल्यार कांसाळें वादक कृणाल हरमलकार आनी आकाश वांयगणकार, शमेळ वादक शैलेश हरमलकार आनी योगेश शिरोडकार हांचो आस्पाव आसा.
‘घुमट हेरंब’ हे सिडीच्या लोकार्पण सुवाळ्या वेळार ‘मी होणार सुपरस्टार’ कार्यावळींत तिसरो आयिल्लो गोंयचो पंगड ‘जिग्यासा’ आनी गोंयच्या तशेंच महाराष्ट्रांतल्या कलाकारांनी कला सादर केली. सुरज पिंगे, प्रमोद गांवस आनी सुभाष कामळकार हांचो ह्या वेळार सन्मान जालो. तशेंच विवीध कलाकारांचो भोवमान जालो.
सुत्रसंचालन नेहा उपाध्ये हांणी केलें. उपकाराचें उलोवप करतना कामळकार हांणी ‘घुमट हेरंब’ ह्यो सिडी आनी पॅनड्रायव्ह पुराय गोंयांत उपलब्ध आशिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
