भांगरभूंय | प्रतिनिधी
भारतीयांक 5- 5 मातयेच्यो पणट्यो पेटोवपाचें विहिंपचें आवाहन
अयोध्या, खबरां संस्था: राम मंदिराच्या उक्तावणाची तारीख आजूनय निश्चीत जावंक ना. तरी 2024 मेरेन भगवान रामाचें दर्शन सामान्य भाविकां खातीर सुरू जावपाची शक्यताय आसा. ते नदरेन यत्नूय करप चालू आसा. तशेंच जानेवारींत रामाचे मुर्तीची प्राणप्रतिश्ठापना करतले. हे कार्यावळीच्या नियोजनाची जापसालदारकी विश्व हिंदू परिशद आनी राष्ट्रीय स्वयंसेवक संघ हांचे कडेन आसा. कार्यावळ नियोजना खातीर आयतारा जाल्ले बसकेंत म्हत्वाचे निर्णय घेतल्यात. तशेंच, रामराज्याभिशेक सुवाळो म्हळ्यार मुर्तीची प्राणप्रतिष्ठा करपाची तारीख निश्चीत केल्या.
जानेवारीच्या तिसर्या सप्तकांत राम मंदिराचो अभिशेक करतले. ताका देशभरांतल्यान एक लाख संतांक आमंत्रीत करतले, अशी म्हायती विहिंपच्या वरिश्ठ फुडार्यान दिली.
विहिंपचे कार्यकारी अध्यक्ष अलोक कुमार हांणी सांगलें, एक लाख महंतांना आपयतले. तांच्या रावपाची वेवस्था करतले. तशेंच अयोध्येंत येवपी भक्तांक फुकट जेवणाची वेवस्थाय करतले. 21 ते 23 जानेवारी मजगतीं ही कार्यावळ जातली. राम मंदिराच्या अभिशेक सुवाळ्या पयलीं बजरंग दळ 2281 शौर्य यात्रा काडटलें. 30 सप्टेंबर सावन 15 ऑक्टोबर मेरेन ही पदयात्रा आसतली. हे यात्रे मजगतीं बजरंग दळान धर्मीक बसकाय आयोजीत केल्यात.
अभिशेक दिसा पयलीं देशभरांतले विवीध मठ आनी देवळांनी पुजा, यज्ञ, हवन आनी आरती करतले अभिशेका उपरांत कोट्यांनी भाविकांक प्रसादूय वाट्टले, अशी म्हायती अलोक कुमार हांणी दिली.
जानेवारींत दिवाळी
अभिशेक दिसा देशभरांतल्या रामभक्तांनी आपापल्या घरांनी पांच मातयेच्यो पण्टो पेटोवपाचो उलो विश्व हिंदू परिशद आनी संघान मारला.
मजगतीं, प्राण प्रतिश्ठापना कार्यावळीक प्रधानमंत्री नरेंद्र मोदी अयोध्येक येतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
