भांगरभूंय | प्रतिनिधी
हैदराबाद, खबरां संस्था : तेलुगू देशम पक्षाचे अध्यक्ष आनी आंध्र प्रदेशाचे आदले मुख्यमंत्री चंद्रबाबू नायडू हांकां शेनवारा सकाळीं अटक जाली. आंध्र प्रदेशाच्या गुन्यांवकारी तपास खात्यान चंद्रबाबूचेर 350 कोटी रुपयांच्या स्कील डेव्हलोपमेंट भानगड प्रकरणांत गुन्यांव दाखल केला.
ह्या प्रकरणां विशीं एफआयआर 2021 वर्सा नोंद जाल्ली. सीआयडीन चंद्रबाबू नायडू हांचे विरोधात फौजदारी प्रक्रिया संहितेच्या कलम 50 (1) (2) खाला अटक वॉरंट जारी केल्लो. ईडीचे चवकशेंत चंद्रबाबून घोटाळो केला अशें प्रथमदर्शी दिसून आयिल्लें. कुशळटाय विकास येवजणे खाला 241 कोटी रुपयाचो निधी सेल कंपनींक धाडलो. त्या प्रकरणांत 8 जाणांक पयलींच अटक केल्या.
शेनवारा सकाळीं 3 वरांचेर चंद्रबाबूक अटक करपाक एक पंगड आयलो. ही म्हायती कार्यकर्त्यांक कळ्ळे बरोबर ते नायडूच्या घरां भायर जमले. मजगतीं, पुलीस पंगडय थंय पाविल्लो. आनी निमाणे आयज सकाळीं 6 वरांचेर चंद्रबाबूक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
