भांगरभूंय | प्रतिनिधी
सोशल मिडियाच्या दर्यांतल्यान…
फाटले कांय दीस सोशल मिडियाचेर चार वर्सां पिरायेच्या एका भुरग्याचो व्हिडियो व्हायरल जाला. आयज बिरेस्तार मेरेन तो ४ कोटी ३० लाख लोकांनी पळयला. ६ लाख लोकांनी शॅर केला, तर २० लाख लोकांनी लायक केला आनी ताचेर उणेच ५० रिमेक आयल्यात. ताचे रिंगटोनूय जाल्यात. फुडल्या १५ दिसांनी तो आनीक व्हायरल जावपाचो आसा.
तो व्हिडियो आसा एका पदाचो. ‘आमच्या पप्पांनी गणपती आणला…’ ह्या पदाचेर अभिनय करपी हो भुरगो आसा, साईराज गणेश केंद्रे. रातीं भितर हो भुरगो स्टार जाला. तो महाराष्ट्रांतल्या बीड जिल्ह्यांतल्या परळी तालुक्यांतल्या कन्हेरेवाडीचो.
हाचे पयलीं तो देड वर्सांचो आसतना केल्लो ‘आई मला पावसात जाऊ दे’ हो व्हिडियो सादारण व्हायरल जाल्लो. चार वर्सांचो आसलो तरी तो उलोवपाक हुशार आसा. विशेश म्हणल्यार तो सोबीत हावभाव करता. २७ जुलयाक ताच्या बापायन हो व्हिडियो अपलोड केलो आनी राती भितर तो व्हायरल जालो. हें पद दुसऱ्यान गायलां. साईराजान फक्त अभिनय केला. खास करून ‘टुकुटुकू बघतोय चांगला’ हे ओळीचेर ताणें केल्लो अभिनय लोकांक आवडला. आतां ताचो अश्टमी निमतान नवो व्हिडियो आयला. ह्या पदाचे खरे गायक आसात, माऊली घोरपडे आनी शौर्या घोरपडे. ह्या दोन भयण- भावांनी तें पोरुं रेकाॅर्ड केल्लें.
सोशल मिडियाचेर व्हिडियो करपाक आवडटा, ह्या प्रस्नाचेर साईराजान शाळेचो अभ्यास करपाक आवडटा, अशें सांगलें. तो लोव्हर केजींत शिकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
