अयोध्या : संवसारांतलें सगळ्यांत व्हडलें धर्मीक पर्यटन केंद्र
भांगरभूंय | प्रतिनिधी
32 हजार कोटींचे प्रकल्प सुरु, दर म्हयन्याक 1 कोटी भक्त दितले भेट
लखनौ, खबरां संस्था : अयोध्येक आनीक सोबीत करपाक मोदी सरकारान 32 हजार कोटींचे प्रकल्प सुरु केल्यात. अयोध्या हें संवसारांतलें सगळ्यांत व्हडलें धर्मीक पर्यटन केंद्र करपाचो प्रधानमंत्री नरेंद्र मोदी हांचो हांवेस आसा. ते स्वता ह्या पुराय प्रकल्पाचेर लक्ष घालतात.
सरकार 320 कोटी खर्च करुन अयोध्येंत मर्यादा पुरुषोत्तम श्रीराम आंतरराष्ट्रीय विमानतळ बांदता. पर्यटन खात्यान दिल्ले म्हायती प्रमाण, रामलला देवळाच्या उक्तावण पयलीं हो विमानतळ सुरू जातलो. तशेंच 9 एकरांचेर 219 कोटी रुपया खर्च करून अयोध्या धाम बसस्टॅण्ड बांदतात. अयोध्या जंक्शना खातीर 150 कोटीचें बजेट केल्लें, पूण आतां तें वाडून 230 कोटी मेरेन पावलां. सुमार 10 हजार चौखण मिटरांत रेल्वेची नवी इमारत बांदपाचें काम सुरू आसा. तातूंत 125 कुडी, हॉस्टेल, फूड प्लाझा आनी 24 डब्यांचे 3 प्लॅटफॉर्म आसतले.
योगी सरकारान 20 परस चड हॉस्पिटॅलिटी कंपनींक परवानो दिला. अयोध्यांत 20 पांच ताऱ्यांचीं हॉटेलां बांदपाचे आसात. हातूंत ताज हॉटेला सयत जायत्या व्हडल्या हॉटेलांचो आस्पाव आसा.
देवळाचे काम सुरु जाले उपरांत रामनगरींत पर्यटक आनी भक्तांचो आंकडो दुपेटीन वाडला. हाकाच लागून रामलल्लाचें देवूळ बांदले उपरांत करोडांनी भारतीय भक्त अयोध्येक भेट दितले. तांच्या रावपाची खासा तयारी सरकार करता. देवूळ बांदले उपरांत दर म्हयन्याक उणेच 1 कोटी भक्त हांगा येतले, अशें अधिकाऱ्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
