भांगरभूंय | प्रतिनिधी
वेगळेवेगळे सुवातेर आमकां बाटल्यो पळोवंक मेळटात. बाटल्यांचो आकार, रंग वेगळोवेगळो आसता. मातयेची बाटली, कवचेची
बाटली, प्लास्टीक, तांब्याची पितुळची, स्टिलाची बाटली अश्यो तरेकवार बाटल्यो आमी पळयतात.
कांयच कळना तेन्ना सावन आमचो बाटले कडलो संबंद जुळटा. मोनो नासतना ‘बाटली’ अशी उतरां तोंडांतल्यान येतात. दिश्टी पडटा पूण वळखूंक कळना त्या वेळार बाटली वेंगायता. ही बाटली जावन आसा ल्हान भुरग्यांचो बोम. तान आनी भूक लागता तेन्ना भुरगें रडटा. आवय बाटलेचो बोम भरून भुरग्याक दिता. चीव चिड्डून चिड्डून बाटली रिकामी करीत भुरगें आपली भूक भागयता. आवयचे मांडये वेल्यान परतत भुरगें दिमकुऱ्यांनी फुडें वता.
पांच वर्सां पिराय जाली की भुरगें बोमाची याद विसरता. बाटलेंतलो बोम कुशीक दवरून भुरगीं उदकाची बाटली हातांत घेता. शाळेंत वतना विसरनासतना आवय बॅगाच्या भायल्या खणांत उदकाची बाटली दवरता. चड वेळ उदक गरम उरपाक स्टिलाचे, तांब्याचे बाटलेंत उदक भरता. घरांत थरमास भरून उदक दवरतात.
धा वर्सां पिरायेच्या भुरग्याक गोड पेय पियेवपाची संवय लागता. तरेकवार स्वादाचें पेय आमकां पिवपाक मेळटा. आमरस, आलें, जिरें, आपोल, पेर, बदाम ह्या सारकें तरेकवार गोड, तिखट, आंबट अशा कितल्याशाच रंगाचें रुचीक पेय पितात. गरमेन घामाच्यो पावळ्यो गळोवन ताळो सुकता तेन्ना थंड सोडाची बाटली पियेवन तान भागयतात.
सोडाचे बाटलेंत पयलीं एक गड्डो आसतालो. हो गड्डो चिड्डून बाटली उगडटाली. आमच्या वाड्या वयलो केरकार साकाच्या खणांनी सोडाच्यो बाटल्यो दवरून सायकलीच्या दांड्यार दाळून गांवांतल्या गाड्यार व्हरून विकतालो. हो सोडा पियेवपाक रुचीक लागतालो. आतां लिंबू सोडा करतना बाटल्यो पळोवन पयलींच्यो यादीं तकलेंत घोळटात.
18 वर्सां पिराय जाली की भुरगीं आपलें बरें वायट चितूंक लागतात. ल्हान आसतना आवय-बापाय वांगडा घरांतल्यान भायर सरपी आतां एकलीच घरा भायर वचूंक लागलीं. हेवटेन तेवटेन भोंवतना सांगात्यांची वळेरी वाडटा. खिणा खिणाक सेलेब्रेशन पार्ट्यो मनयतात. जल्मदिसाची पार्टी, पास जाल्यार पार्टी, कामाक लागल्यार पार्टी, रीण काडून गाडी हाडल्यार पार्टी. ह्या पार्ट्यांनी कांय वेळार बियरीच्यो बाटल्यो उगडटात. बऱ्या वायटाचे वाटेर चलपी आपली जीण हेच वाटेर, हेच पिरायेर घडटा.
40 वर्सांचे पिरायेर आपलो संवसार उबो करता तेन्ना वेगळ्यावेगळ्या गजालींचेर मात करपाक वावुरतना मनाचो ताण वाडटा. जाय नाका अशे तरेकवार विचार तकलेंत घोळटात तेन्ना तकली भेरेता. हे भिरकेन नशा केल्यार रिलेक्स जातलों अशें समजून अचकीत सोऱ्याची बाटली हाताक लागता. कांय गजालींचो विसर पडटा. केन्ना केन्ना आपल्या संवसाराची वाटूय लागता. मागीर तो सोऱ्यांत बुडटा.
50 वर्सां हुपली की जाण्टेपणाचीं सोंपणां ल्हवू ल्हवू चडटा. दुसऱ्यांचो आदार आसल्यार कामां सुटसुटीत जातात. हे पिरायेचेर मनशाचें दुयेंस वाडटा. दोतोरालीं वखदां घेवचीं पडटात. दोतोर शारपाची बाटली दिता. घरांत वखदांच्यो बाटल्यो नदरेक पडटात. दुयेंत मनीस हॉस्पिटलांत अॅडमीट जाल्यार खांटीर सराची बाटली हुमकळटना दिसता. बाटलेंतलो एक एक थेंब दुयेंस पयस करून भलायकी बरी दवरता.
जिणेची वाट सोंपतकूच मनशाक मरण येता. धव्या कपड्या आड मेल्लो मनीस न्हिदता. शेजारी, वांगडी, दुस्मान, सोयरे मेल्ल्या मनशाचें निमाणे मुखामळ पळोवपाक येतात. येतात ते ताचे जिणेंतली काणी सांगून दोळ्यांक रडोवन वतात. मडें मसंडींत पावता आनी निमाण्या खिणाक बाटलेंतलें पेत्रोल
सरणाक जळयता.
असो हो बाटलेंतलो प्रवास जिणेंत सगल्या मळार आपलो वावर करीत रावता. अशी ही आमच्या जिणेंतली बाटली.
विनोद लक्ष्मण गावडे
9823547047
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
