भांगरभूंय | प्रतिनिधी
भांगरभूंय । खबरां मेज
पणजीः नामनेचो कोंकणी गीतकार जॉन आगियार हाणे बरयल्ल्या ‘विठ्ठला ओंठार तुजें नांव’ ह्या नव्या कोंकणी भक्ती व्हिडिओ गीताचे जल्माश्ठमीच्या म्हूर्तार आदलो आमदार प्रवीण झांट्ये हाचें हस्तुकीं पणजेच्या सम्राट अशोक सभाघरांत एके सादे कार्यावळींत लोकार्पण केलें.
आदले उपसभापती शंभू भाऊ बांदेकार, रेणुका देसाय ह्या वेळार हाजीर आशिल्ली. हें गीत गायक अक्षय नायक हाणे म्हणलां. संगीत/वेवस्था/मिक्षण लेगीत ताचेंच आसा. सावयवेरेंच्या श्री महालसा रेकॉर्डींग स्टुडिओंत ताचें रिकॉर्डींग केलां. डीओपी/एडिटिंग/कॅमेरा आनी ड्रोन पायलटिंग आय क्लिक उद्धव केरकर हाचें आसा. 6.18 मिनटांचो व्हो व्हिडिओ पुरायपणान श्री विठोबा देवस्थान, वराड पाटणे, गावणे- फोडें हांका चित्रीत केला.
जॉन आगियार आनी अक्षय नायक हांच्या यू ट्यूब चॅनलाचेर व्हो व्हिडिओ अपलोड केला. व्हिडिचो निर्मणे खातीर प्रवीण झांट्ये हाणे जॉन आगियार आनी अक्षय नायक हांची तोखणाय केली. म्हाका ही रचना मनासांवन आवडली. आगियार आनी नायक हांणी आपलें हें काम चालूच दवोरचे. तांका जाय तें सहकार्य करपाची आपली तयारी आसा अशें ताणे सांगलें. व्हो व्हिडिओ म्हणल्यार एक तरेची सामाजीक चळवळ आसा अशें सांगून बांदेकार हाणी जॉन आनी अक्षयाक परबीं भेटयलीं. मडगांवच्या चौगुले कॉलेजांत शिकतना जॉन आगियार व्हो म्हजो क्लासमेट आशिल्लो. ताचो म्हाका अभिमान असेंअशें सांगून रेणुका देसाय हिणे अक्षय एक प्रतिभावंत कलाकार आशिल्ल्याचें सांगलें. अश्या प्रकल्पां खातीर अर्थीक फाटबळ मेळपाक जाय अशें अक्षय नायकान सांगलें. लोक आपल्या भक्तिगीतांची तोखणाय करतात ताका लागून गीतां बरोवपाक ऊर्बां मेळटा अशें जॉन आगियारान हाणे आपल्या येवकाराच्या उलोवपांत सांगलें. कवयित्री कालिका बापट हिचेंय ह्या वेळार उलोवप जालें. अॅड हर्षा नायक हाणे सूत्रसंचानल करून निमाणे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
