भांगरभूंय | प्रतिनिधी
नवी दिल्ली, खबरां संस्था ः अर्थशास्त्रा प्रमाण एकूण देशांतलें उत्पादन (जीडीपी) वाडत वता तशें रोजगार आनी रोजगाराची संदूय वाडटा. पूण फाटल्या स वर्सांत देशांत जीडीपीचे गतीचे तुळेंत रोजगाराची संद सामकीच उणी जाल्या. 2020- 21 वर्साचो कोरोना काळ सोडल्यार 2017 ते 2023 ह्या स वर्सांत जीडीपी सरासरी 4.61% आसून 9.1% चड आशिल्ली. पूण रोजगाराचे प्रमाण 1.4% उणे उरलें. ‘सेंटर फॉर मॉनिटरिंग इंडियन इकोनॉमी’च्या अहवाला प्रमाण 2016-17 वर्सा देशांतलो वट्ट कामगार वर्ग 41.27 कोटी आशिल्लो. 2022-23 वर्सा तो 40.5 कोटी मेरेन देंवलो. म्हणल्यार 77 लाख रोजगार उणो जालो.
देशांतली रोजगार पद्दत 2016-17 ते 2017-18 ह्या काळांत बदलली. कामगार वर्ग शेतकी आनी उद्देगधंद्यांतल्यान सेवा क्षेत्रांत गेलो. ताका लागून ह्या दोन वर्सांत देशांतल्यो १ कोटी 85 लाख नोकऱ्यो गेल्यो. 2017-18 वर्सा एक कोटी लोकांची नोकरी गेली. शेतकी क्षेत्रांत 2017-18 वर्सा 40 लाख नोकऱ्यो आनी 2018-19 वर्सा 10 लाख नोकऱ्यो उण्यो जाल्यात. मजगतीं, सेवा क्षेत्रांत 1.70 कोटी नवे नोकऱ्यो निर्माण जाल्यो. 2020-21 वर्सा 2.17 कोटी लोकांच्यो नोकऱ्यो गेल्यो. चडश्यो नोकऱ्यो उत्पादन क्षेत्रांतल्यो गेल्यो. पूण ह्या क्षेत्रांत दर मनशाचे उत्पादकतेंत वाड जाल्या. सेवा क्षेत्रांत रोजगार 2020-21 वर्सा 6.7 टक्क्यांनी देंवलो.
2018-19 आनी 2017-18 वर्सा रोजगार दर अनुक्रमान -0.3% आनी -1.3% आशिल्लो. कोरोना उपरांत 2021-22 वर्सा वाडीचो दर 9.1% नोंद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
