भांगरभूंय | प्रतिनिधी
बेधुंद जावन देवाच्या भजनांत नाचत, गायत कशे तल्लीन जावप हाचो अणभव घेवपाक जाय जाल्यार दर बिरेस्तारा फोंडें म्हालांतल्या अवेडें, बोरी हांगा आपली वस्ती केल्ल्या साईबाबाच्या दरबारांत मुद्दाम भेट दिवची आनी ‘याची देही, याची डोळा’ प्रचिती
घेवची.
सांजवेळा भजन, आरती जाले उपरांत श्रीसाईबाबांची पालखी देवळाच्या प्रांगणांत पांच प्रदक्षिणां काडटा. ह्याे प्रदक्षिणां काडपा वेळार साईबाबांचो गजर, आरत्यो, ताळ, मृदंग हांची सुरेख आनी बेधूंद करपी सूर आनी तालांची मैफील सर्गसुखाचे तेंगशेर पाविल्ली आसता.
थळावे भक्तजन, फोंडेंचे सरभोंवतणी घराबो केल्ले लोक, फुलां, उजवाती विकपी बायलां, चणेकार, बोमाडेकार रातच्या आठ वरांचेर जावपी पालखी प्रदक्षिणेक मुजतरत हाजेरी लायतात.
अशें म्हणटात की Age Is Just a Number…. आनी हाचो अणभव घेतलो जाल्यार वेळांत वेळ काडून बोरयेच्या साईबाबांच्या चरणार लीन जावपाक येवपाक जाय. आपले पिरायेचीं 65 ते 70 आनी वयर पाविल्लीं जाण्टीं बायलां तालाच्या ठेक्यार बेधूंद जावन दिंडी खेळटात. आपले णववारी न्हेसण सांबाळत भजनांत तल्लीन जातात, तेन्ना अजापान तोंडांतल्यान शब्द भायर सरतात, ‘जिथे दिव्यत्वाची प्रचिती, तेथे कर माझे जुळती’.
पालखेच्या प्रदक्षिणां वेळार जाण्टे, नेण्टे, जाण्टीं बायलां हांच्या आंगात खंय शंबर हतयाचें बळ संचारिल्लें आसता, आनी बाबान दिल्ल्या ह्या अद्भुत शक्तीचेरूच हीं जाण्टीं बायलां बेधूंद जावन वराचीं वरां पालखे मुखार नाचूंक शकतात, आनी तांचीच देख घेवन हेर भुरगीं, बायलां तशेंच तरणाट्यो चलयो आपले सूख, दुख्ख आनी विवंचनां विसरून साईबाबांच्या दरबारांत आपली हाजेरी लायतात. भक्तगणांचो असो विश्वास आसा की बाबा आपल्या भक्तगणांक आपल्या दरबारांतल्यान केन्नाच रित्या हातान परतून धाडिना….
पालखेची प्रदक्षिणां पुराय जाले उपरांत भक्तगणांक महाप्रसादाचें जेवण आसता. बोरी गांवांत अशें मानतात की ज्या दिसा बाबांचो महाप्रसादचो नैवेद्य आसता, त्या दिसा चडशा बोरयेकारांगेर रांदपाक चूल पेटना.
थळाव्या कलाकारांचो मोलादीक वांटो आशिल्ल्या ह्या दिंडी, पालखेच्या प्रदक्षिणेचो निखळ आनंद घेवपाचो आसत जाल्यार बिरेस्तारा बोरयेच्या बाबांच्या दरबारांत हाजेरी लावपाक जाय….
साईनाथ महाराज की जय !
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
