भांगरभूंय | प्रतिनिधी
नवी दिल्ली, खबरां संस्था : मे म्हयन्यांत लोकसभा वेंचणूक जावपाची आसा. सगळे राजकी पक्ष नेटान तयारेक लागल्यात. ह्या सगळ्या बोवाळांत २०२१-२२ ह्या अर्थीक वर्सा खातीर देशांतल्या मुखेल राजकी पक्षांच्या जमाखर्चाचो हिशेब मुखार आयला.
एडीआर म्हळ्यार Association for Democratic Reforms हे संस्थे वरवीं राजकी पक्षांच्या जमाखर्चाचे म्हायतीचो अभ्यास जालो. ताचो अहवाल हालींच तांणी प्रकाशीत केला. ह्या अहवालांतल्यान देशांतल्या ८ मुखेल पक्षांचे अर्थीक स्थिती विशीं म्हत्वाची म्हायती मुखार आयल्या. तातूंत भाजपा आनी कॉंग्रेसी वांगडा राष्ट्रवादी कॉंग्रेस, बसप, भाकप, माकप, तृणमूल कॉंग्रेस आनी एनपीईपी ह्या राष्ट्रीय पक्षांचो आसपाव आसा.
‘सीएनबीसी १८’ चॅनलान ह्या अहवालाचें सविस्तर वृत्त संकेतस्थळार दिलां. एडीआरान तयार केल्ल्या अहवाला प्रमाण ह्या आठ पक्षांनी मेळून वट्ट ८ हजार ८२९ कोटींची संपत्ती जाहीर केल्या. २०२०- २१ ह्या अर्थीक वर्सा हो आंकडा ७,२९७.६२ कोटी इतलो आशिल्लो.
भाजपाचे तिजोरेंत कोट्यांनी भर
ह्या अहवाला प्रमाण, भाजपाची संपत्ती २०२१- २२ त ६,०४६.८१ कोटी इतली जाल्या. पोरूं होच आंकडो ४,९९० कोटी आशिल्लो. ताका लागून २०२१-२२ ह्या वर्सा भाजपाचे संपत्तींत २१.१७ टक्क्यांनी वाड जाल्ल्याचें ह्या अहवालांत म्हणलां.
कॉंग्रेसीची संपत्ती ८०५.६८ कोटी
भाजपा प्रमाण कॉंग्रेसीच्या संपत्तीतूय १६.५८ टक्क्यांची वाड जाल्या. पक्षाची संपत्ती ६९१.११ कोटीं वयल्यान ८०५.६८ कोटीं मेरेन पावल्या.
बसपाची संपत्ती देंवल्या..!
मजगतीं, भाजपा आनी कॉंग्रेसीची तिजोरी फुगल्या. बसपा हो आठ पक्षां मदलो एकूच पक्ष, जाची संपत्ती ह्या काळांत वाडूंक ना. ती देंवल्या. ५.७४ टक्के इतली ती देंवल्या. ६९०.७१ कोटीं वयल्यान ७३२.७९ कोटी जाल्या.
तृणमूल कॉंग्रेसचें कितें?
२०२०-२१ त तृणमूल कॉंग्रेसची वट्ट संपत्त १८२ कोटी आशिल्ली. २०२२ त हातूंत १५१.७० टक्क्यांनी वाड जाली आनी हो आंकडो ४५८.१० कोटीं मेरेन पावलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
