भांगरभूंय | प्रतिनिधी
धेंपो म्हाविद्यालय आनी पेडणेंच्या सरकारी म्हाविद्यालयान गोंय विद्यापीठा वतीन आयोजीत केल्ले टॅनीकॉयट वस्तादपण सर्तींत वळेरेन दादल्यांच्या आनी बायलांच्या गटांत वस्तादपण जोडलें.
सर्त गोंय विद्यापिठाच्या ज्युबली हॉलांत आयोजीत केल्ली. राष्ट्रीय खेळां दिसाचें निमित्त सादून शारिरीक शिक्षण आनी खेळां संचालक डॉ. शैलेंद्र गांवकार हांचे हस्तुकीं मेजर ध्यानचंद हांच्या पुतळ्याक हार घालून सर्तीक सुरवात केल्ली. ह्या वेळार खेळां अधिकारी, गोंय विद्यापीठ तशेंच फीट इंडियाची बेट्टी डिसिल्वा उपस्थीत आशिल्लीं.
दादल्यांच्या गटांतले फायनलींत कुजिराच्या श्रीनिवास सिनाय धेंपो म्हाविद्यालयान मडगांवच्या गोविंद रामनाथ कारे कायदो म्हाविद्यालयाक 2-0 अशा फरकान हारयलें. आतिफ जकातीन संदेश गांवकाराक 13-21, 21-18 आनी 21-12 अशा फरकान हारयलो, जाल्यार साहिल जमखंडीन शुभम पागीक 21-12, 21-6 असो हारयलो.
बायलांच्या गटांतले फायनलींत पेडणेंच्या सरकारी म्हाविद्यालयान पणजीच्या डॉन बॉस्को म्हाविद्यालयाक 2-1 असो हारयलें. कल्पिता वेळस्कारान साधना अश्वेकाराक 13-21, 21-18 आनी 22-20 अशा फरकान हारयलें. त्रिवेणी सावंतान अर्पिता सावंताक 21-15 21-11 हारयलें. निर्णायक दोट्टी मॅचींत त्रिवेणी सावंत आनी साधना अश्वेकर हांणी कल्पिता वेलस्कार आनी अर्पिता सावंत हे जोडयेक 19-21, 21-7 आनी 22-20 अशा फरकांनी हारयली.
दादल्यांच्या गटांत सर्वोत्कृश्ट खेळगड्याचो पुरस्कार गोविंद रामनाथ कारे कोयदो म्हाविद्यालयाच्या संदेश गांवकाराक आनी बायलांच्या गटांत पेडणेंच्या सरकारी म्हाविद्यालयाचे त्रिवेणी सावंत हिका फावो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
