भांगरभूंय | प्रतिनिधी
भांगरभूंय । प्रतिनिधी
दिवचलः गोयांत राबितो करून आशिल्ल्या केरळीयन लोकांनी गोंयां कडेन आपलें नातें जुळोवन घेतला. सगल्या लोकां वांगडा ते भावचारान रावतात. गोंयचे उदरगतींत तांचें म्हत्वाचें योगदान आसा. केरळीयन लोक मेहनती आशिल्ल्यान सध्या ते सगल्या मळांत वावुरतना दिसतात. आतां ते पुरायपणान गोंयकार जाल्यात अशें दिवचलचो आमदार डॉ चंद्रकांत शेट्ये हाणे सांगलें.
कल्पका असोसिएशन ह्या केऱली भावांच्या संघटने वतीन बोड्डें दिवचल हांगच्या महामाया मंदिर सभाघरांत आयोजीत केल्ल्या ओणम उत्सवात मुखेल सोयरे ह्या नात्यान डॉ शेट्ये उलयताले. माचयेर मयेंचो आमदार प्रेमेंद्र शेट, दिवचलचो नगराध्यक्ष कुंदन फळारी, साखळेची नगराध्यक्ष रश्मी देसाय, गोंय मल्ल्याळी असोसिएशनाचो अध्यक्ष वासू नायर, कल्पका असोसिएशनाचो अध्यक्ष पी वी जयप्रकाश आनी हेर मानेस्त आशिल्ले.
केरळांतल्या आयिल्ले लोक आता सगळे बाबतींत गोंयकार जाल्यात. आतां ताच्या चलयाचें लग्न गोयकारांक केडन जावपाक लागला. गोंय व्हो असो प्रदेश आसा जंय भायल्यान आयिल्ले लोक गोंय सोडपाक तयार आसनात, केरळी लोकांनी गोंयांक आपलेशें केलां अशें डॉ शेट्ये हाणे फुडें उलयतना सांगलें. कुंदन फळारी आनी रश्मी देसाय आनी वासू नायर हांची ह्या वेळार भाशणा जाली. पोक्कलम ह्या फुलांची रांगोळी घालपाचे सर्तींत मल्ल्याळम मिशन- साखली हांकां पयलें, जॉन्सन ग्रूप- मुळगांव हाकां तिसरे आनी रवींद्र ग्रूप- माशेल हांका तिसरें इनाम फावो जाले. शिक्षणीक मळाव बरी कामगिरी केल्ल्या विद्यार्थ्यांचो भोवमान केलो. कार्यावळी उपरांत खाशेल्या केरळी जेवणाचो आस्वाद सगळ्यांनी घेतलो. केरळी सांस्कृतीक कार्यावळी सादर केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
