भांगरभूंय | प्रतिनिधी
तिरुअनंतपुरम, खबरां संस्था : भाजपाचे कांय खासदार आनी फुडारी नथुराम गोडसेक ‘देशभक्त’ म्हणटात, पूण राज्यपाल पी. एस. श्रीधरन पिल्ले हांणी ‘गोडसे हो भारताक लागिल्लो शाप’ अशें वक्तव्य केलां. पिल्ले हे दोन फावटीं केरळांत भाजपा राज्य अध्यक्ष आशिल्ले. देखून तांच्या ह्या वक्तव्या खातीर कांय जाणांनी अजाप उक्तायलां.
वेलियम राजीव हांणी बरयिल्ल्या ‘गांधी विरुद्ध गोडसे’ ह्या पुस्तकाची सुदारीत आवृत्ती आयतारा केरळांतल्या कोल्लम शारांत उजवाडाक आयली. ते कार्यावळींत पिल्ले हांणी वयलें विधान केलें. ही खबर केरळांतल्या onmanorama.com ह्या संकेतथळार उजवाडाक आयल्या.
आपल्या भाशणांत राज्यपाल पिल्ले हांणी गांधीजींच्या तत्वज्ञानाची तोखणाय केली. ३० जानेवारी १९४८ दिसा गोडसे हाणें महात्मा गांधीजींचो खून केलो. गोडसे आरएसएस (राष्ट्रीय स्वयंसेवक संघ) आनी हिंदू महासभेचो वांगडी आशिल्लो. देखून ताणें तें करपाक जायनाशिल्लें. मागीर, कारण कितेंय आसूं. नथुराम गोडसे हो भारताक लागिल्लो शाप अशें म्हाका दिसता.
गांधीजींचे यादीं मुखार हांव नतमस्तक जातां. संवसार आसा तो मेरेन गांधीजींचें तत्वज्ञान मनीसपणाचो मार्ग प्रकाशीत करीत वतलें. मात, गोडसे भारताक मेळिल्लो शाप म्हूण कायम उरतलो, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
