भांगरभूंय | प्रतिनिधी
भारत संवसारांतल्या पयल्या तीन अर्थवेवस्था मदीं आसतलो
नवी दिल्ली: 2047 मेरेन भारत विकसीत राष्ट्र जातलें अशें प्रधानमंत्री नरेंद्र मोदी हांणी एके मुलाखती वेळार सांगलें. भ्रश्टाचार, जातिवाद हांकां आपले राष्ट्रीय जिणेंत स्थान ना अशें तांणी म्हणलें. प्रधानमंत्री नरेंद्र मोदी हांणी पीटीआय हे खबरां संस्थेक विशेश मुलाखत दिल्या. 9-10 सप्टेंबर दिसा नवी दिल्लींत जी-20 देशांची बसका जायत आसतना ही मुलाखत जाली. तशेंच केंद्रान 18 ते 22 सप्टेंबर मजगतीं, संसदेचें विशेश अधिवेशन आपयलां.
भारताच्या जी-20 अध्यक्षपदाचे खूबशे सकारात्मक परिणाम जाल्यात. तातूंतले कांय म्हज्या काळजाच्या सामके लागीं आसात अशें मोदी हांणी विशेश मुलाखतींत सांगलें.
मोदी हांणी म्हणलें, संवसाराचो जीडीपी केंद्रीत दृश्टीकोन आतां मानीस केंद्रांत बदलत आसा. हातूंत भारत उर्बा दिवपी भुमिका वठयत आसा. सबका साथ, सबका विकास हें विश्व कल्याणाचें मार्गदर्शक तत्व लेगीत थारूंक शकता.
भारतीयां खातीर व्हड संद
नरेंद्र मोदी हांणी म्हणलें, जी-20 आमचे शब्द आनी दृश्टी जग फक्त कल्पना म्हूण पळयना जाल्यार फुडारा खातीर एक रोडमॅप म्हूण पळयता. आयज भारतीयांक विकासाचो पांवडो घालपाची व्हड संद आसा जी फुडलीं हजारांनी वर्सां यादींत उरतलीं. एक अब्ज भुकेल्ल्या पोटांचो देश म्हूण भारता कडेन खूब पयलीं पळयताले. आतां तो एक अब्ज म्हत्वाकांक्षी मनाचो आनी दोन अब्ज कुशल हातांचो देश आसा.
एका दसका परस उण्या काळांत पांचव्या स्थानार झेप घेवपाचे कामगिरीचो उल्लेख करतना प्रधानमंत्री मोदी हांणी म्हणलें, रोखडोच भारत संवसारांतल्या पयल्या तीन अर्थवेवस्था मदीं आसतलो.
पाकिस्तान आनी चीनाचे आक्षेप भायरायले
कश्मीर आनी अरुणाचल प्रदेशांत जी-20 बसका घेवपा विशीं पाकिस्तान आनी चीनाचो आक्षेप प्रधानमंत्री मोदी हांणी भायरायलो आनी देशाच्या दरेक वाठारांत बसका घेवप सभावीक आशिल्ल्याचें सांगलें.
सायबर गुन्यांवाचो संदर्भ दिवन प्रधानमंत्री नरेंद्र मोदी हांणी ताचे कडेन लडपा खातीर संवसारीक सहकार्याचे गरजेचेर भर दिलो. तांणी म्हणलें, बेकायदो अर्थीक क्रियाकलाप आनी आतंकवाद्या आडचे लडायेंत सायबरस्पेसान पूर्णपणान नवो आयाम सादर केला. सायबर धमक्यो गंभीरतायेन घेवंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
