भांगरभूंय | प्रतिनिधी
मनीस म्हूण जल्माक येवप हें जण एकल्याचें भाग्य. ताणें जिवितांत बऱ्यो गजाली करपाक जाय. प्रामाणीकपणान जगपाक जाय. फटिंगपणा, धोंगीपणा, लाचारी, हुजरेगिरी करपाक जायना. आमकां ह्या संवसाराचें, सैमाचें दर्शन घडटा हो विचार करून प्रत्येकान समाधानान जगपाचो यत्न करपाक जाय. सैमाक लागून आमकां जगपाची शक्त मेळटा. एकेकदां आमी आमची तुळा दुसऱ्यां वांगडा करतात. आमकां दिसता दुसऱ्या कडेन आमचे परस खूब बऱ्यो गजाली आसात. आमी खूबच दुख्खी आसा, अशें जण एकलो समजता आनी मागीर मानसीक ताणाक बळी पडटात.
एकेकदा अशें जाता की आपूण फुटक्या नशिबाचो, बाकी सगले सुखी अशें दिसता. ताण- तणाव, गरिबी आपल्याच नशिबांत कित्याक, असो विचारूय कांय जाण करतात. थोडे दुसऱ्याचें अनुकरण करतात. ताच्या दारांत चार चाकी गाडी, आलिशान बंगलो आसा म्हूण ताचेर जळटात. दुसऱ्याचें सुख ताच्या दोळ्यांत खुपता. दुसरो खावन- जेवन सुखी, समाधानी आसा, हें थोड्यांक पळोवं नज जाता. हें सगलें मेळोवपाक तांणी खूब कश्ट. रातदीस मेहनत केल्ली आसता, हें कोणूच चिंतीनात. तो करोडपती, ताची जिंदगी फोल्गां मारपाची, अशे ताका थोमणे मारतात. थोडे दुसरो मुखार वता जाल्यार ताचे पांय ओडटात. आपूण करीनात आनी ताकाय कितें बरें करपाक दिनात.
हाचे उरफाटो गरीब बाबडो, एकदां जेवता आनी रातचो उपाशी न्हिदता. जोडपी एकलो आनी खावपी धा तोंडां. पूण ताचो चॅरो सदांच आनंदी. ना ताच्या कपलाचेर आंटयो, ना दुख्खाची सया. सदां शांत, सुखी, समाधानी जीण जगता तो. आपलें दुख्ख सुतकी चॅरो तो समाजाक दाखयना. दुसऱ्यांक दोळ्यांतलें दुक दाखयना. गरिबी कडेन लढाय करीत आपल्या कुटुंबा वांगडा हांसऱ्या तोंडान जगता.
खरेंच आपलें मुखामळ हांसरें आसल्यार आमकांय समाजांत असलेच हांसरे चॅरे मेळटात. म्हणटात न्हय,
हँसते गाते जहाँ से गुजर
दुनिया की तू पर्वा न कर
मुस्कुराते हुअे दिन बिताना
यहाँ कल क्या होगा किसने जाना….
–
सिद्धी तिळवे
९१५८२००९५६
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
