भांगरभूंय | प्रतिनिधी
खबरां संस्था
कोलंबोः आशिया कप 2023 सर्तींत भारत आनी पाकिस्तान ह्या पारंपरीक प्रतिस्पर्धी पंगडांत आयज श्रीलंकेंतल्या कँडी स्टेडियमात पयली मॅच जातली. दोनूय पंगड चार वर्सां उपरांत वन-डे मॅच खेळटले. तांची निमणी वन-डे मॅच 2019च्या वर्ल्ड कपांत जाल्ली. भारतीय पंगडांत सगळ्यांत चड सात फावट आशिया सर्तींतचें वस्तादपण मेळयलां.
केएल राहुल, श्रेयस अय्यर आनी जसप्रीत बुमराह दुखापतींतल्या बरे जावंन पंगडांत आयल्यात. भारत स्पीन बॉलिंगेंत पाकिस्ताना परस बरो आसलो तरी पाकिस्तानाचे फास्ट बॉलर भारताच्या बॅट्समनांक सतावपाक शकतात. 2018 वर्सा कॅप्टन रोहीत शर्मान भारताक आशिया करंड जिखून दिल्लो. 2019चे वन-डे वर्ल्ड कपा उपरांत भारत 57 वन-डे मॅची खेळ्ळा. तांतूतल्या 34 भारतान जिखल्यात. फाटल्या दिसांत भारतात वेस्ट इंडिज, श्रीलंका आनी न्यूझिलंडाक वन-डे माळेंत हारयलां.
विराट कोहली, रोहीत शर्म, शुभमन गील हांच्या वांगडा श्रेयस अय्यर आनी केएल राहुल पंगडांत आयिल्ल्यान भारताची बॅटिंग मजबूत जाल्या. सकयल्ले फळेंत हार्दिक पंड्या आनी रवींद्र जडेजा हे बॅट्समन आसतले. जसप्रीत बुमराहाचें पदार्पण जाल्ल्यान भारताचे बॉलिंगेक धाय येवपाक शकतली. मोहम्मद सिराज आनी मोहम्मद शमी ह्या वेळार बऱ्या फॉर्मांत आसात. 2019चे वर्ल्ड कपा उपरांत सगळ्यांत चड विकेटी घेवपी शार्दूल ठाकूर पंगडांत आसा. रवींद्र जडेजा वांगडा कुलदीप यादव स्पीन डिपार्टमेंटांक मजबूती दितले. अक्षय पटेलाच्या रुपान तिसरो स्पीनर पंगडा कडेन आसा. स्पीन बॉलिंगे बाबतींत भारत पाकिस्ताना परस बरो आसा. पंगडांत पुनरागमन करपी बुमहारान आयर्लंडा आडचे माळेंत 4 विकेटी घेवंन आपलो फॉर्म दाखोवन दिला. सातव्या नंबराचेर खेळपी जडेजा उपरांत भारताची बॅटिंग तितलीशी बरी ना. निमाण्या 12 बॉलांत 15 धांवड्यो करपाची जापसालदारी कुलदीप, बुमराह, शमी वा सिराज घेवपाक शकतले काय ना, व्हो प्रश्न आसा.
भारताच्या चडशा बॅट्समनांक दावखुऱ्या फास्ट बॉलरांक खेळपाक कुस्तार जाता. 2021 सावन आयज मेरेन रोहीत शर्मान वन-डेंत 5 फावट दावखुऱ्या फास्ट बॉलरांक आपली विकेट दिल्या. विराट कोहलीन लेगीत तांका विकेटी दिल्यात. भारतीय पंगडांत एक लेगीत दावखुरो फास्ट बॉलर ना.
पाकिस्तानाची मजबूत टॉप ऑर्डर
पाकिस्तान आयसीसी वन-डे क्रमवारींत पयले सुवातेर आसा. आशिया कपा पयलीं ताणी श्रीलंकेत अफगाणिस्ताा आडची 3-0 अशी वन-डे माळ जिखल्या. इमाम उल हक, फकर जमान आनी बाबर आझम 2019च्या वन-डे वर्ल्ड कपा उपरांत बरे फॉर्मांत आसात. भारताचे तुळेंत पाकिस्तानाची टॉप ऑर्डर मजबूत आसा. विशेश म्हणल्यार तांच्या पंगडात 4 अश्टतासी खेळगडे आसात. मात ताची मदली फळी तितली बरी ना आनी फिल्डिंगूय म्हणपा सारकी ना. शादाब खान आनी मोहम्मद नवाज ह्या अश्टतासी खेळगड्यांचेर पाकिस्तानाक आशिया कप जिखून दिवपाची जापसालदारी आसा. पाकिस्तानाचे फास्ट बॉलर शाहीन शाह आफ्रिदी, नसीम शाह आनी हारिस रावफाक कशें तोंड दिवप हाचे होमवर्क करून आमी मैदानांत देंवतले अशें भारताचो कॅप्टन रोहीत शर्मान सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
