भांगरभूंय | प्रतिनिधी
बेगीन कामां करचीं; नाजाल्यार जावंक शकता अर्थीक लुकसाण
ऑगस्ट सोंपला. सप्टेंबरां जायते म्हत्वाचे अर्थीक नेम बदलपाचे आसात. अशे परिस्थितींत तांची म्हायती आसप गरजेचें. सप्टेंबरांत म्हत्वाचीं कामां पुराय करपाची गरज आसा. नाजाल्यार समस्या वाडूंक शकतात. हातूंत सगळ्यांत म्हत्वाचें काम, ३० सप्टेंबर मेरेन २००० रुपयांच्यो नोटी बदलप.
हेर म्हत्वाचीं कामा म्हयनो सोंपचे पयलीं करपाक जाय. ती म्हळ्यार…
१. एलपीजी सिलिंडराचेर २०० रुपयांची मेळटली सवलत
केंद्रीय मंत्रिमंडळान एलपीजी सिलिंडराचेर २०० रुपयांची सबसिडी जाहीर केल्या. उज्ज्वला येवजणेच्या लावार्थ्यांक आदीं सावन मेळपी २०० रुपयांचें अनुदान सोडून हे येवजणेचो वेगळो लाव मेळटलो. आतां हे येवजणेच्या लावार्थ्यांक सिलिंडराचेर ४०० रुपयांचो लाव मेळटलो. सप्टेंबरांत तुमी सिलिंडर बूक करतलीं तेन्ना प्रती सिलिंडराचे २०० रुपया उणे दिवचे पडटले.
२. २००० च्यो नोटी बदलपाची निमाणी तारीख
२ हजार रुपयांच्यो नोटी बदलपाची मुजत ३० सप्टेंबर सावन सोंपतली. ह्या म्हयन्यांत बँकांचे सुटयेची वळेरी तपासल्या उपरांत लागींच्या बँक फांट्यांत वचून बेगीनूच तुमी २००० रुपयांच्यो नोटी बदलच्यो. ३० सप्टेंबरा उपरांत जर तुमी नोटी बदलूंक ना जाल्यार तुमकां लुकसाण जावंक शकता.
३. आधार डेटा फुकट अपडेट करपाची निमाणी संद
तुमकां तुमचें आधार कार्ड फुकट अपडेट करपाचें आसल्यार १४ सप्टेंबर मेरेन हें काम पुराय करचें. युआयडीएआयन फुकट आधार अपडेट करपा खातीर १४ सप्टेंबराची मुजत थारायल्या. पयलीं ही सुविधा फकत १४ जून मेरेन दिताले, उपरांत १४ सप्टेंबर मेरेन ही सुविधा वाडयली. हे तारखे मेरेन तुमी आधाराचो तपशील फुकट अपडेट करूंक शकतात.
४. डिमॅट खात्या खातीर नामांकन प्रक्रिया पुराय करपाची निमाणी तारीख
जर तुमीडिमॅट खात्यांत नामांकनाची प्रक्रिया पुराय करूंक ना, जाल्यार तुमी हें काम ३० सप्टेंबरा पयलीं पुराय करचें. नामांकीत नाशिल्लें खातें दिल्ले तारखे उपरांत सेबी वरवीं निश्क्रीय करपाक शकतात.
५. क्रेडीट कार्डाच्या नेमांत बदल
तुमचे कडेन जर Axis Bank Magnus क्रेडीट कार्ड आसल्यार सप्टेंबर सावन तांच्यो अटी आनी सर्तींत बदल जावपाक शकतात. कांय वेव्हारांचेर सप्टेंबर म्हयन्या सावन गिरायकांक विशेश सवलतींचो लाव मेळचो ना. हाचे सयत १ सप्टेंबर सावन नव्या कार्डधारकांक जीएसटी सायत १२, ५०० रुपया वर्सुकी शुल्क भरचें पडटलें. जाल्यार आदल्या गिरायकांक १०,००० रुपया चड़ जीएसटी भरचो पडटलो. ज्या गिरायकांनी वर्सूयभर २५ लाख रुपयां मेरेनची खरेदी केल्या ताचें शुल्क माफ करतले.
६. ३० सप्टेंबर सावन सोंपतली स्टेट बँक ऑफ इंडियाची ही सुविधा
SBI चे ‘WeCare ’ येवजणेंत गुंतवणूक करपाची आसल्यार फकत सप्टेंबर मेरेन गुंतवणूक करपाक मेळटा. हे येवजणे खातीर गुंतवणूक करपाची मुजत ३० सप्टेंबराक सोंपता. एसबीआयचे हे येवजणेचो लाव फकत ज्येश्ठ नागरिकांक मेळूंक शकता. हे येवजणे खाला तांकां पांच वर्सां आनी ताचे वयर ७.५०% मेरेन व्याज मेळटा.
७. पॅन आनी आधार लिंक करात
पॅन आनी आधार कार्ड लींक करपाचे नदरेनय एक अपडेट आयल्या. ह्या म्हयन्याच्या निमाणें मेरेन नागरिकान पॅन-आधार जोडलो ना जाल्यार ताचें पॅन कार्ड सप्टेंबर म्हयन्या उपरांत म्हळ्यार १ ऑक्टोबर २०२३ दिसा निश्क्रीय जातलें. तुमचो पॅन आधारा कडेन जोडिल्लो ना जाल्यार ताचो तुमच्या डेमॅट खात्याचेरूय परिणाम जातलो.
८. अमृत महोत्सव एफडींत गुंतवणूक करपाची निमाणी तारीख
आयडीबीआय बँकेच्या अमृत महोत्सव एफडी येवजणेंत गुंतवणूक करपाची मुजतय ३० सप्टेंबर सावन सोंपता. ३७५ दिसांची ही एफडी येवजण सामान्य नागरिकांक ७.१० टक्के आनी ज्येश्ठ नागरिकांक ७.६० टक्के व्याजदर दिता. त्याच वेळार ४४४ दिसांच्या एफडी खाला सामान्य नागरिकांक ७.१५ टक्के आनी ज्येश्ठ नागरिकांक ७.६५ टक्के व्याज मेळूं येता.
९. पेट्रोल आनी डिझेल मोलांत बदल
दर म्हयन्याचे निमाणे तारखेक पेट्रोलियम कंपनीं पेट्रोल आनी डिझेलाच्या दरांचेर नियाळ घेतात. अशे परिस्थितींत ऑगस्टाच्या निमाणे कडेन येवपी सणांचो हंगाम पळोवन बदल जावं येता. अशें जालें जाल्यार बर्याच काळा उपरांत सप्टेंबरा सावन पेट्रोल आनी डिझेलाच्या दरांत बदल जातलो. पेट्रोल आनी डिझेलाचें दर उणें करपाचोय पर्याय सरकारा कडेन आसा अशें बाजार तज्ञांचें मत आसा. तशें केल्यार सणाच्या हंगामांत देशांतल्या सामान्य गिरायकांक ताचो व्हड फायदो जावपाक शकता.
१०. सीएनजी आनी पीएनजीचे किमतींत बदल
सरकारान एलपीजी गॅस सिलिंडरांच्या दरांत सवलत जाहीर केल्या. आतां सप्टेंबर सावन सीएनजी आनी पीएनजी गिरायकांकूय सुटका मेळटली अशी आस्त आसा. येवपी सणांच्या हंगामांत गिरायकांचेर आशिल्लें चेंपण उणें करपा खातीर सरकार दरांत कपात करपाची घोशणा करूंक शकता. पूण ३१ ऑगस्टाच्या मध्यान रातीं मेरेन ही गजाल उक्ती जातली. कांय म्हयन्यां आदीं सरकारान सीएनजी-पीएनजीचे दर थारावपाचें नवें सूत्र जाहीर केल्लें. ताच्या मतान आतां दर म्हयन्याक सीएनजी-पीएनजी मोल थारायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
