भांगरभूंय | प्रतिनिधी
भारतान काल दादल्यांच्या आशियायी हॉकी 5 संवसारीक करंड पात्रताय फेरयेंत येजमान ओमान पंगडाक 12-2 अशा गोल फरकांनी हारयलो. पूण, सांज वेळार पाकिस्ताना आड जाल्ले दुसरे मॅचींत 4-5 अशा फरकान हार घेवची पडली.
मनिंदर सिंगान 17व्या आनी 29व्या मिनटाक, गुरजोत सिंगान 12व्या मिनटाक आनी मोहम्मद राहिलान 21व्या मिनटाक गोल केलो. पाकिस्ताना वतीन एहतेशाम असलमान दुसऱ्या आनी तिसऱ्या मिनटाक, जिकरिया हयातान पांचव्या, अब्दुल रहमानान 13व्या आनी अब्दुल राणान 26व्या मिनटाक गोल केलो.
पाकिस्तानान सुरवाती सावन आपलो शेक दवरलो. असलमान भारताच्या दुबळ्या डिफॅन्साचो फायदो घेवन रिव्हर्स हीट वरवीं वगोल केलो.
भारतान प्रतीहल्लो केलो. पूण, पाकिस्तानाचो गोलकीपर अली रजान उत्कृश्ट रितीन बचाव केलो. ते उपरांत असलमान आनीक एक गोल केलो. ते उपरांत हयातान गोल करून स्कोर 3-0 केलो. तीन गोलांनी फाटीं पडिल्ल्या भारतान आक्रमक खेळ केलो. हाचो ताका फायदो जालो. भारतान आपलें खातें उगडलें. पूण, अब्दुलान गोल करून स्कोर 4-1 असो केलो.
भारतान दुसऱ्या अर्दांत आक्रमक खेळ केलो. ह्या अर्दांत ताणें चार गोल केले. पूण, पाकिस्तानान आनीक एक गोल करून मॅच 5-4 फरकान जिखली.
ते पयलीं सकाळीं भारतान येजमान ओमानाक 12-2 असो हारयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
