भांगरभूंय | प्रतिनिधी
भांगरभूंय। प्रतिनिधी
पोरणे गोंयः सुमार धा वर्सांच्या कायदेशीर लडाये उपरांत गोवा वेल्हा पंचायत मंडळान गांवांतल्या मैदानाची उदरगत करपा खातीर मान्यताय दिल्ली. ह्या कामा खातीर 2021 वर्सा बुन्यादी फातोर बसयल्लो. मात अजून मेरेन मैदानाचें काम सुरू केल्लें ना. खेळां मंत्री गोविंद गावडे हाणे अदूंच्या मार्च म्हयन्यांत काम पुराय करपाचें उतर दिल्लें. प्रत्यक्षांत सगलें काम बंद पडलां आनी गांवांतल्या खेळगड्यांचे आशेर उदक पडलां.
पोरूं नोव्हेंबर म्हयन्यात मंत्री गोविंद गावडे, थळावो आमदार विरेश बोरकार आनी आदलो आमतार फ्रान्सिस सिल्वेरा हांणी ह्या मैदानाची पळोवणी केल्ली. विरेश बोरकार हाचे कडेन मैदानाच्या कामा विशीं चवकशी केली तेन्ना ताणे गोविंद गावडे हांणी मैदानाचे सुवातेंत दुकांना ,कोर्टयार्ड आनी हेर सुविधा आशिल्लें खेळां संकुल बांदपाचो प्रस्ताव दिला अशें सांगलें. ह्या कामा खातीर सल्लागार नेमचो पडटलो अशें गावडे हाणे सांगला अशी म्हायती ताणे दिली. पयलीं मैदान विकसीत करून उपरांत खेळां संकुल बांदपाक जायना अशें विचारलें तेन्ना दुकानांक लागून प्लेयींक फिल्ड दुसरे कडेन व्हरचें पडटलें अशें बोरकारान सांगलें.
मैदान जाता तितल्या बेगीन जावचें म्हणून आपूण खेळां मंत्री गोविंद गावडे तशेंच खेळा खात्याच्या अधिकाऱ्यां कडेन फाटपुरवण करीत आसा. फुडल्या कांय दिसांत गावडे आनी तांच्या अधिकाऱ्यां कडेन आपूण उलोवणी करतलो अशी म्हायती बोरकार हाणे दिली. तरणाट्यांक खेळपाक मेळचें हें खातीर मैदानाचे पयलीं उक्तावण करपाची सूचोवणी आदलो उपसरपंच आनी सध्याचो पंच लियो डिसोझा हाणे केल्या. खेळां संकुल बांदपाचें थारायल्यार सगल्यांच गजालींक वेळ लागतोलो अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
