भांगरभूंय | प्रतिनिधी
खरें म्हणल्यार एक दीस आसलो तरी तांचे भाव वा भयण जावपाचो यत्न करात. तांचे मम्मा वा पापा तांचे भाव आनी भयणय जावंक शकतात
भारतीय संस्कृतायेंतलो एक अद्भुत सण म्हणल्यार रक्षाबंधन!! ते दीस भयण आपल्या भावाचे सगले अपशकुन पयस जावपाची इत्सा धरता आनी भाव आपले भयणीक सगल्या दुस्मानां कडल्यान सांबाळपाचें उतर दिता. अजाप न्हय, फकत हें कारण पळोवन तुमकां ती मनोवपाची इत्सा जाता. पूण तो मनोपाक मात्सो प्रॉब्लेम आसा – तुमकां भावंड जाय! हय, तुमच्यांतले जायते जाण म्हणटले गरजेचें न्हय – तुमकां आपलो भाव आनी तुमी तिका तुमची भयण अशें समजुपी खंयचेय चलये कडल्यान ‘राखी’ मेळूं येता. खरें, खूब खरें, पूण हें चड करून पुराय मनीसजातीक एक व्हडलें सुखी कुटुंब आनी सगल्यांक तुमचे भाव- भयणीं मानपा सारकें. पेन आनी कागदाचेर, दुसऱ्याक समजायतना वा वाद घालतना हें खरेंच बरें दिसता. पूण, खरेंच कशें दिसता तें कळपाक जाय जाल्यार मागीर कोणाक तरी विचारात, जाका भावंड ना, तो एकलोच भुरगो. ते चलयेक विचारात, जेन्ना तिचो दरेक इश्ट तिचो भाव तिका कितें भेट दितलो हें विचारता आनी तिका फकत तें आयकून ओग्गी रावचें पडट्टा, तेन्ना कशें दिसता वा मनगटाचेर एकूय ‘राखी’ लेगीत नाशिल्ल्या त्या भुरग्यांक शाळेंत दाखोवंक सांगात.
हांव एक सामको निराशावादी प्रकारचो मनीस आनी अशा रंगीत कार्यावळीची मजा पुरायपणान नश्ट करतां अशें तुमकां दिसतलें. म्हजेर विस्वास दवरात, म्हजो हेतू असो न्हय. तुमचे भोंवतणीं अशे लोक आसात, जांकां हो प्रसंग मनोवपाक भाव वा भयण नासूं येता हें तुमकां समजूंक जाय आशिल्लें. ना, हांव तुका अचकीत तांचे भाव वा भयण जावपाक सांगना, फकत सांगलां तें म्हणल्यार तांच्या भावनां विशीं मात्शी सहानुभूती बाळगप आनी असो कोणूय आसल्यार मात्सो उणो ‘शो ऑफ’ करप.
हांव हें कित्याक म्हणटां, कारण ल्हानपणांत ही म्हजीच एक तरेची काणी आशिल्ली. म्हाका भावंडां नात आनी हाव सदांच एक लजपी ल्हान भुरगो आशिल्लो. देखून जेन्ना- जेन्ना ह्यो परबो वा घडणुको येताल्यो तेन्ना- तेन्ना हांव तांकां भियेतालो. हेर भुरग्यांक हांव केन्नाच दोश दिना. कारण ते म्हजे सारके ल्हान क्युटीस सगले आपलीं भेटवस्तू आनी राखी दाखोवपाक चड खोशी आशिल्ले. तशें केल्यार कांयच चूक ना. पूण एका देवदूतान म्हजें दुख्ख समजून म्हाका सांत्वन दिवपाचें काम आपल्याचेर घेतलें. तें कुटुंब आमकां सामकें लागीं आशिल्लें आनी तांची धूव पौर्णिमाकूय म्हजे सारकी भयण, भाव नाशिल्ले, तें म्हाका राखी बांदतालें, जाका लागून म्हाका लेगीत बरें दिसतालें आनी हेर भुरग्यांक राखी बी दाखोवपाक मेळटाली.. आनी ती दरवर्सा तशें करता. तिणें म्हाका एक भाव म्हूण मोग दिला, आमी सांबाळून दवल्यात संबंद. हें जरी चडशें असामान्य न्हय, जायते राखी भयणी आनी/ वा भाव आसात.
पूण आयच्या अणुकेंद्रीय कुटुंबांतल्या संवसारांत जंय जोडप्यांक फकत एकूच भुरगें जल्माक घालप ‘परवडटा’ थंय अशीं परिस्थिती जावपाक शकता. तर मागीर हीं एकटीं भुरगीं खंय वतात? तांणी कितें करचें? सण मनोयप बंद करप, सगळ्यांत सोपो उपाय बरोबर. आवयन तांकां राखी बांदूं येता. एकसूरपणाक लागून तांची भावना खिणाक वश जावंक शकता, पूण त्या रिकाम्यापणाचे दीर्घकाळ तिगून उरपी परिणाम ते व्हड जातकच पळोवंक मेळटात. कसल्याच प्रकारच्या भावंडांची आसक्ती नाशिल्लीं भुरगीं व्हड जावन एकले, मत्सर करपी, हिंसक, कुरकुरीत आनी/ वा लजपी जावंक शकतात. आडवाद अर्थांतच आसतले, पूण सादारणपणान अशें जाता.
देखून तुमी पालक आसत जाल्यार आनी तुमी हें वाचतात जाल्यार ही ‘राखी‘ तुमच्या भुरग्या वांगडा घालपाचो यत्न करात. तांकां ताचो अर्थ कितें तें समजावपाचो यत्न करात, भाव- भयण ह्या उतरांचें खरेंच मोल तांकां समजून दिवपाचो यत्न करात. खरें म्हणल्यार एक दीस आसलो तरी तांचे भाव वा भयण जावपाचो यत्न करात. तांचे मम्मा वा पापा तांचे भाव आनी भयणय जावंक शकतात अशें. कारण व्हडले म्हणून आमी फुडले पिळगेक आमच्यो चालीरिती आनी संस्कार समजावपाचो हो अतिरिक्त यत्न करपाक जाय.
रक्षा बंधनाचीं परबीं !!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
