भांगरभूंय | प्रतिनिधी
आशिया करंड क्रिकेट सर्तीक आयच्यान सुरवात जाता. उक्तावणाची मॅच येजमान पाकिस्तान आनी नेपाळ ह्या पंगडां मदीं मुल्तान शारांत जातली.
नेपाळ पयले खेपे आशिया करंड क्रिकेट सर्तींत वांटेकार जाता. नेपाळान आशिया करंड पात्रताय फेरयेंत उत्कृश्ट प्रदर्शन केल्लें. फायनलींत ताणें युएईक 7 विकेटींनी हारोवन आशिया करंड सर्तींतली सुवात निश्चीत केल्ली.
नेपाळ अजून मेरेन 57 वन डे मॅची खेळ्ळा. हातूंतल्या 30 मॅचींनी जैत जाल्यार 25 मॅचींनी हार घेवची पडल्या. एक मॅच टाय उरल्या जाल्यार एके मॅचीचो निकाल लागूंक ना.
नेपाळान वन डे फॉर्मेटांत सगल्यांत चड मॅची युएई आड खेळ्ळ्यात. 2018 सावन आतां मेरेन दोनूय पंगडां मदीं 15 मॅची जाल्यात. हातूंतल्यो नेपाळान 9 मॅची जिखल्यात. युएई खेरीत नॅदरलॅण्ड आनी स्कॉटलॅण्ड ह्या पंगडांक लेगीत नेपाळान हारयल्यात.
वन डे क्रिकेटींत नेपाळा वतीन मुखेली रोहित पौडेलान सगल्यांत चड धांवड्यो केल्यात. ताणें 52 मॅचींनी खेळटना 31.93चे सरासरीन 1469 धांवड्यो केल्यात. ताचे उपरांत आसिफ शेख आनी कुशल भुरतेल हांचो क्रमांक लागता. बॉलिंगेंत स्पिनर संदीप लामिछानेन 49 मॅचींनी सगल्यांत चड 111 विकेटी घेतल्यात.
दोनूय पंगडांचेर नदर मारली जाल्यार पाकिस्तानाचेंच दालें जड दिसता. ताचे कडेन एका परस एक सरस खेळगडे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
