भांगरभूंय | प्रतिनिधी
नवी दिल्ली, खबरां संस्था ः सीबीआयन अंमलबजावणी संचालनालयाच्या एका अधिकाऱ्याक अटक केल्या. दिल्ली अबकारी धोरण प्रकरणांतलो दुबावीत, वेपारी अमनदीप सिंग धल्ल हाचे कडल्यान पांच कोटी रुपयांची लांच घेवपाचो ताचेर आरोप आसा.
सीबीआयन ईडीचे कागाळीचेर ईडीचे सहाय्यक संचालक पवन खत्री आनी वरिश्ठ विभागीय लिपिक नितेश कोहर हांचे आड एफआयआर दाखल केल्ली. अबकारी प्रकरणांतले हेर दुबावीत- एअर इंडियाचो कर्मचारी दीपक सांगवान, अटक केल्लो अमदीप सिंग धल्ल, बिरेंदर पाल सिंग (गुरूग्राम), चार्टर्ड एकाउंटंट प्रवीण कुमार वत्स, क्लेरिजेस हॉटेलाचे सीईओ विक्रमादित्य आनी हेर कांय अधिकारी.
ईडी कागाळी प्रमाण दिल्ली अबकारी धोरण घोटाळ्यांतल्यान सुटका मेळोवपा खातीर अमनदीप सिंग ढल्ल आनी बिरेंदर पाल सिंग हांणी डिसेंबर 2022 ते जानेवारी 2023 मजगतीं ईडी अधिकारी प्रवीण वत्साक 5 कोटी रुपया दिल्ले.
ईडीक दिल्ले जापेंत प्रवीण वत्स हांणी सांगलें, दीपक सांगवानान कांय रकमेच्या बदलाक अमनदीप धल्ल हाका अटक करपा पसून राखण दिवपाचें उतर दिल्ले. सांगवानान डिसेंबर 2022 वर्सा ईडी अधिकारी पवन खत्री हांचे कडेन वत्स हांची वळख करून दिली.
प्रवीण वत्सान डिसेंबर 2022 ते जानेवारी 2023 ह्या काळांत अमनदीप कडल्यान तीन कोटी रुपया घेतले. उपरांत दीपक सांगवानान वत्साक सांगलें, आनीक दोन कोटी रुपया फारीक केल्यार अमनदीप धल्लाक आरोपांतल्यान सुटका मेळूं येता. प्रवीण वत्सान ही गजाल अमनदीप सांगली. ताणें हो प्रस्ताव मान्य केले उपरांत वत्सान धल्ला कडल्यान आनीक दोन कोटी रुपया घेतले.
अमनदीपाच्या बापाय कडल्यान मेळिल्ले रकमेंतल्यान दीपक सांगवान आनी पवन खत्री हांकां एडवान्स 50 लाख रुपया दिल्ले अशें प्रवीण वत्सान ईडी कडेन उलयतना सांगलें. पूण सांगवानान आश्वासन दिवन लेगीत अमनदीप हाका 1 मार्च 2023 दिसा ईडीन अटक केली.
धल्लाच्या कुटुंबांतल्यान घेतिल्ले पयशे परत करपा खातीर जूनांत प्रवीण वत्स हांकां मेळिल्ल्याचें दीपक सांगवान ईडीक दिल्ल्या निवेदनांत सांगलां. ह्या कांय बसकांनी दोन ईडी अधिकारी पवन खत्री आनी नितेश कोहर हेय हाजीर आशिल्ले.
हाचे उपरांत ईडी अधिकाऱ्यांनी चवकशी सुरू केली आनी दुबावीत अधिकाऱ्यां वांगडा आरोपींच्या घरांची तपासणी केली. प्रवीण वत्स हांच्या घरांतल्यान ईडीन 2.19 कोटी रुपया आनी 1.94 कोटी रुपयाचे हिऱ्याचे अलंकार जप्त केल्यात. तशेंच ताच्या बँक खात्यांत 2.62 कोटी रुपया आशिल्ले. तशेंच इडीन दोन लक्झरी गाडयोय जप्त केल्यात. इडीच्या सांगण्या प्रमाण, एफआयआर दाखल केले उपरांत सीबीआयन आरोपी संबंदीत हेर सुवातींचोय सोद घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
