भांगरभूंय | प्रतिनिधी
मुंबय, खबरां संस्था ः 8 म्हयने, 60 गुन्यांव, 20 सरकारी बँको, 60 कंपनी आनी 23,566 कोटी मोलाचे अर्थीक घोटाळे. केंद्रीय गुन्यांवकारी तपास खात्याच्या मुंबय मुखेल कार्यालयाचें हें प्रगती पुस्तक.
जानेवारी ते ऑगस्ट 2023 ह्या काळांत सीबीआयन मुंबय, नागपूर, पुणे ह्या तीन शारांनी वेगवेगळ्या क्षेत्रांतल्या कंपनींनी केल्ल्या हजारांनी कोटींच्या अर्थीक घोटाळ्यांचो उक्ताडार केला आनी हे संबंदी वट्ट 60 गुन्यांव नोंद जाल्यात.
हातूंत बांदकाम उद्देग, मुळावी बांदावळ, भांगरा उद्देग, मनरिजवण उद्देग, साकर कारखानो, वेअर हावसिंग, बायोटेक आदी कंपनींचो आस्पाव आसा.
हो डेटा फकत मुंबयंत सीबीआयन नोंद केल्ल्या प्रकरणांचो आसा. देशांतल्या जायत्या राज्यांनी बँक फटवणूक करपाच्यो अशेंच गुन्यांव नोंद जाल्यात आनी वट्ट रक्कम मुंबय नोंद जाल्ल्या रकमे परस कितलेशेच पटींनी चड आसा.
हाचो जायत्या बँकाचेर परिणाम जातलो. हांतूत सगळ्यांत चड सरकारी बँकाचो आस्पाव आसा. हातूंतल्या उण्यांत उण्या 60 प्रकरणांत युनियन बँक ऑफ इंडिया, स्टेट बँक ऑफ इंडिया आनी पंजाब नॅशनल बँक हांकां सगळ्यांत चड परिणाम जाल्याचे दिसता.
रिणाचें खातें मुजतवाड जातकच तांची म्हायती भारतीय रिझर्व्ह बँक, सीबीआय आनी केंद्रीय सतर्कताय आयोगाक बँकेच्या मुखेल सतर्कताय अधिकाऱ्या वरवीं कळोवपाचें धोरण पयलींच रिझर्व्ह बँकेन जाहीर केलां. पूण चडशे फावट ही पद्दत पाळनात. तेंच ह्या कळावाक कारण. – विश्वास उटगी, बँकिंग तज्ञ.
चालू वर्सा बँकांनी 200 परस चड कंपनीं आनी तांच्या संचालकांचेर गुन्यांव दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
