भांगरभूंय | प्रतिनिधी
एक अणभव – 22
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो. – लेखक
गुलगुलाताच्या फुडारपणा खाल थोडे वांगडी गंडभैरांवाक मनोवपाची तयारी करूक लागिल्ले. फुडें देखभाल कशी जातली हाची सगळ्याक चिंता आतां पडिल्ली. (आतांं मुखार….)
गंडभैरांवान लोंढो भिकाजीक नोटीस दित आपल्या परम ब्रह्मास्त्राचो वापर केल्लो. सगळे वांगडी आतां हार मानतले आनी आपल्या पाया कडें येतले अशी ताची अपेक्षा आसुये. ताणें एकदम ताणून धरपाचें थारायिल्लें. ताचे तकलेंत व्हडलें राजकारण शिजतालें. गुलगुलात तागेल्याच पंगडातली, पूण जेन्ना ताका मनोवपाक गेली, ताणें कानार केंस काडले. घडये तिका घेवनूच तो हें राजकारण खेळटालो. वांगड्यांक बुद्द शिकोवचे खातीर नखरे करतालो. बँकेचें खाते गंडभैरांवा कडे म्हणजे तागेल्या समिती कडें आशिल्लें आनी मुखावेली देखभाल चलोवपाक, चेक दिवपाक, जनरल बॉडी मान्यताय ना म्हणत ताणें साफ न्हयकार दिल्लो. सगळ्या वांगड्याल्यो xx आंवळून आनी अंदुंन धरून सतोवपाची घडये ताची येवजण आशिल्ली. वांगड्याली प्रेसांवा आतां वाडूंक लागिल्ली. प्रत्येकाक आप-आपल्या घराचे पडून गेल्ले. देखभाल ना जाल्यार आपल्या घराचें मोल उणें जातलें हो भंय तांकां आशिल्लो. गेटी वेले राखणदार जर काडून घेतले तर भायल्यान कोणीय भितर सरीत, आपल्या घराचो विध्वंस करीत ह्या भयान खूप वांगड्याचे न्हिंदेचें खोबरें जाल्लें. अशीच परिस्थिती एकान- एक वांगड्याची जावन आपल्या कडें विनवण्यो करीत येवपाची वाट गंडभैरांव पळयतालो.
आतां दादा बॉम्ब ई- मेला वरवीं फुटूंक लागिल्ले. वांगड्यांनी आपापले पंगड करून भासाभास आनी चर्चा करूंक सुरवात केल्ली. मदींच कोण वांगडी आपलो शेरमांव सगळ्यांक आयकयतालो. दुसऱ्यांनी कितें करप कशें करप हाचेर आपलें प्रवचन सांगताले, पूण कोण स्वता जबाबदारी घेवंक मुखार सरनाशिल्लो. एक पंगड लोंढो भिकाजीक मनोवपाचे फाटल्यान लागिल्लो. आदींच आमच्या कुस्तार आयतें जोडपी लोंढो भिकाजीलो भाव हातूंतल्यान आनी वाडिल्लो. ताणेंय तापिल्ल्या तव्यार आपली भाकरी तोर्राद कशी भाजून घेवप हाचो आराखडो व्यवस्थित आंखून दवरिल्लो. बशिल्ले कडे लाख मेळटालो, ते वाडोवन देड लाख कशे करपाचे हाचें सपन तो पळयतालो. कामाचो सगळो पेज पंढरी सोंसतालो आनी लोंढो भिकाजी लाखभर रुपयांचें आयतें उत्पन्न आमच्या कुस्तार खातालो. गंडभैरांव धरून समितीच्या चारूय वांगड्याक ताणें देखभालीचे पयशे परत करीत जाल्यार पुसून, चारूय जाणाली देखभाल फुकटांत जाताशिल्ली आनी वयल्यान बशिल्ले कडें म्हयन्याक पन्नास हजार खंय गेले नाशिल्ले. ताचे आनी गंडभैरांवा भितर कितें कबलात आशिल्ली जाणा कोण, पूण दुडवां खातीर घडयेक नासत पूण शेर्त कितें तरी कबलात आशिल्ली. बँक खात्याचो लगाम गंडभैरांवा कडें आशिल्ल्यान थोड्यांनी दुडू डायरेक्ट लोंढो भिकाजीक धाडपाची सुचोवणी बी केली आनी कितल्याश्याच वांगड्यांनी ती उखलून बी धरली. तातूंतल्यान लोंढो भिकाजीलीं फीतां आनीकुय चडिल्लीं.
हो सगळो वांगड्यांचो धेंण चालू आसत सुंदरनांन वांगड्याची विडिओ मिटिंग आपयली. परत्यो वेंचणुको घेवन नवी समिती स्थापन करया तो मेरेन लोंढो भिकाजी वांगडा वाटाघाटी करूंक एक तात्पुरती समिती वेंचून तागेलें कंत्राट एका वर्सां वाडोवन घेवया अशे ते मिटिंगेची विशय वळेरी आशिल्ली. हे मिटिंगेक पंधरा वांगड्यांनी हजेरी लायिल्ली. दलभंजन कोलांटी उडी मारीत हांगां हजेरी लावंक आयिल्लो. दलभंजन तर गंडभैरांव चलयतालो त्या पाषावाल्या समितीचो वांगडी. गंडभैरांव म्हणटा तेंच खरे म्हणपी दलभंजनाक आपल्या जबाबदारीची जाणीव नाशिल्ली. वांकड्या वृत्तीचो गंडभैरांव पीडा दिवपाक माहीर आशिल्लो. देखीक सूय आनी दाबण जर ताच्या मुखार व्हेली तर तो दाबणाक व्हडली सूय आनी सुयेक धाकले दाबण म्हणतालो. हीच वांकडी वृत्ती सूय म्हळ्यार धाकलें दाबण आनी दाबण म्हणल्यार व्हडली सूय घेऊन दलभंजन घडयेक ह्या मिटिंगेक वाट लावूंक आयिल्लो. आपल्याल्या समितींत बसून प्रस्न सुटावे करचे सोडून ताणें दुसरे वाटेनं उडी मारिल्ली. सोसायटी म्हळ्यार गंडभैरांवाल्या बापायले बेंस न्ही तर तो आसा ते समितीची सामुहीक जबाबदारी हें तो आपले सोयी खातीर विसरिल्लो. समितीन राजीनामो दिल्यार बी तांची जबाबदारी हस्तांतरण करीसर आसता हाची जाणीव आसुनय तो माकड उडयो मारतालो. मिटिंग सुरु झाली. हांव आनी तीमण्णा थंड बशिल्ले.
तीमण्णान सुंदरनांन सुचोवणी मागिल्ली तेन्ना म्हणिल्लें की आतां आमी स्वता सोसायटी चलोवपाचें पळोवया, टर्नकी कंत्राटदार बंद करून एक थोडो तेंप कशें चलतां ताचो अणभव घेवया. थोडी बचत बी करूया. पूण आनी एक वांगडी अमीर सिब्बल हांकां तें आयकून नाकसुरे गेल्लें. सिब्बलान तीमण्णाक टोमणो मारलो की फुडले वेंचणुकेंत ताणें लोकशाय पद्दतीन वेंचून येतगेर ताका जाय तशी सोसायटी चलोवपाक तो ताका समर्थन दितलो. इतलो तेंप थंड आशिल्लो आनी कितलेश्याच वर्सांनी अकस्मात जागो जाल्लो सिब्बल तीमण्णाक शाणेंपणां सांगूक लागिल्लो. तीमण्णानच तर सोसायटी करपा खातीर म्हत्वाचें योगदान दिल्लें म्हणून सिब्बलालीं उतरां तीमण्णाल्या काळजांत रोमिल्लीं. अकस्मात येता उदेता आनी फाटभूंय खबर नासतना शापोतां सांगून वता हाचें दुःख ताका जालें. फेस्त करता गांव आनी प्रेसिडेंटीचें नांव, मदींच लुडबुड करून प्रेसिडेंत जावपा सोदिल्ले भशेन, कांयच फाटभुंय नाशिल्ली सिब्बलाली उतरा आशिल्ली.
हांगासर लोकशाय कशी चलोवपाक जाय हाजेर भासाभास तो केनडाक बसून करूक लागिल्लो, फाटलीं पांच वर्सा संकुलांत आयिल्लो ताका कोणेंच पळोवंक नाशिल्लो. हे मिटिंगे खातीर मात ताणें अळम्या भशेन तकली वयर काडिल्ली. सुंदरनांक तेंको दितना ताणें अशेंय म्हणिल्लें की एक तर ताचें आयकयात नाजाल्यार कॉमन लुगार विशय घेवन फोंडांत वचून पडात. आपल्या घराचो वालोर कमी जायत म्हुणुन ताका शितीमेंत जातालो आनी म्हणून तो ह्या वेळार न्हिदांतलो खडखडीत जागो जाल्लो. कार्पोरेट जगतांत काम करून सोसायटी भी कंपनीबशेन चलची अशे ताकाच न्ही आनी चार लोकांकूय दिसताले. टर्नकी कंत्राटदाराक काम दिवोप आनी सगळे ताणें चलोवप, आमी फक्त एक चेक दिवोप अशी वृत्ती खूप जाणाली आशिल्ली. हांगा भायल्या देशांत आसतात त्या पद्धतीचे वेवसायिक हे काम करपाक तरी नातं आनी आसल्यारूय भयंकर लूट मारतात हे समजावपाक वा समजून घेवपाक सिब्बलाली वा कोणाचीच तयारी नासली.
मिटिंग मुखार चालू जाली. सगळेच पंधरा वांगडी मिटिंगेक हजर आशिल्ले. जेन्हा भासभास चालू जाली तेन्ना चडशे लोक लोंढो भिकाजीच्या फावराद उलयत मत लोंढो भिकाजीक दिले आनी हांव तीमण्णा आनी दंडबिंडा हे तिग लोक फक्त पंढरी कडे दिवन स्वतः सोसायटी चलोवपाचेर मतदान केले. बारा विरुद्ध तीन अशीं मतां पडत आमी कुशीत पडिल्लें. तशे आमी चड खंय मेतेर जायनासतना थंडपणान मिटिंग फक्त आयकताले.
आतां वेळ आयलो हें कोणें करपाचें, हे खातीर अंतरीम समिती नेमपाचें मिटिंगेक थारले. हे तीन वांगडी सुचोवपाचें काम मिटिंगेक हाजीर आशिल्ल्या वांगड्याचेंच आशिल्लें. अजापाची गजाल म्हळ्यार नाकशिमरो दलभंजनान समितीचेर येवपाक म्हजें नांव सुचयलें. म्हाका तिडकरूपी धक्को हातूंतल्यान बशिल्लो. देड म्हयन्यां फाटी वर्सुकी सभेक हाणेंच तर म्हाका सोसायटींतल्यान काडून उडोवपाची शिफारस केल्ली. आपलो स्वार्थ सादूंक तो आपली जबाबदारी विसरत म्हाका रिंगणात ओडूंक पळयतालो. ह्या मनशाची लायकी न्हय नालायकी खंयच्या पोंतार आसा हें हांव समजून चुकिल्लो. तिडकीक लगाम घालीत हाचे पसून चार हात पयस रावपाचें हांवें थारायिल्लें. गुलगुलात, सुकांती हांची हे समितीचेर बिनविरोध निवड जाल्ली. तिसरी वांगडी म्हणून आशाचें नांव तीमण्णान सुचयिल्लें. बॅंकेचे खात्याचो ताबो कसो घेवप हाजेरूय भासाभास हांगा जाली. तशी मिटिंगेक कायद्याची मान्यताय नाशिल्ली. समिती सोडून दुसरे वांगडी मिटिंग करताले जाल्यार ताका पयली रेजिस्ट्रार ऑफिसाची मान्यताय लागता ती सुंदरनान घेवंक नाशिल्ली. आनी तेवटेन साकून हे वाटेन उडी मारिल्लो नाकशिमरो दलभंजन फक्त सुवार्थ सोदतालो. (फुडें चलता…)
– अजय करमली
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
