भांगरभूंय | प्रतिनिधी
मडगांव: खासदार ह्या नात्यान पंचायत वाठारांतलीं कामां करूंक शकता. पूण ते खातीर पंचायती कडल्यान प्रस्ताव येवपाची गरज आसा. केळशी गांवाक दिल्ले अॅम्बुलन्सीचो फायदो करून घेवचो आनी ताची देखभाल करची अशें खासदार फ्रान्सीस सार्दीन हांणी सांगलें.
दक्षीण गोंयचे खासदार फ्रान्सीस सार्दीन हांणी खासदार निधींतल्यान केळशी गांवा खातीर अॅम्बुलन्स दिली. ह्या वळार सरपंच डिक्सन वाझ हांचे सयत केळशी पंच वांगडी हाजीर आशिल्ले.
अॅम्बुलन्स भेटयले उपरांत खासदार सार्दीन हांणी म्हणलें, खासदार ह्या नात्यान गांवांक खूबशीं मजत करूंक शकता. पूण पंचायतीं कडकल्यान प्रस्ताव मेळप गरजेचें आसा. प्रस्ताव आयले उपरांत गरजेच्यो त्यो सुविधा दिवं. अॅम्बुलन्स सेवा दितना वाहन बरे स्थितींत दवरपाचें आवाहनूय तांणी पंचायतीक केलें.
केळशी ग्रामपंचायतीक दिल्ले अॅम्बुलन्सीचें उक्तावण जाले उपरांत हाचो फायदो शेजारच्या कार्मोणा आनी ओर्लीच्या गांवांक लेगीत जातलो. ही अॅम्बुलन्स पुरायपणान सुसज्ज आनी वातानुकुलीत आसा. हे अॅम्बुलन्सीक लागून आमच्या गांवच्या लोकांक तशेंच शेजारच्या गांवच्या लोकांक चड करून ज्येश्ठ नागरिकांक मजत जातली अशें केळशीचे सरपंच डिक्सन वाझ हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
