भांगरभूंय | प्रतिनिधी
सगळ्यांनी काल चांद्रयान- 3 मोहीम यशस्वी जातना पळयली. हातूंत सर्वसामान्य लोक आशिल्ले, तशे शाळेंत वचपी विद्यार्थी लेगीत आशिल्ले. क्रिकेट ना जाल्यार सिनेमांतल्या हिरो- हिरोयनीक पळोवपाक जशी गर्दी पडटा, तशी गर्दी हो सुवाळो पळोवपाक जाल्ली. हाचो अर्थ आमी बदलूंक लागल्यात, आमचे विचारसरणेंत बदल जावपाक लागला. इस्रोच्या यशान वैज्ञानिक संशोधकांचो जसो वांटो आसा तसो बऱ्याच बायलांचो लेगीत वांटो आसा, हें आख्ख्या देशान पळयलें. आतां चलयो खास करून गोंयच्यो चलयो प्रत्येक फाट्यांत येतात, तश्यो विज्ञानिक संशोधक जावपाक लेगीत फुडें आयल्यो जाल्यार अजाप न्हय. हालींच इनर व्हील म्हापशेंच्या जोड पालवान एके शाळेंत करियराचो सुवाळो जालो, तेन्ना जायतीं भुरगीं याना विशीं उलयतना कानार पडलें, तांकां ह्या विशयाची चड म्हायती जाय आशिल्ली हे खातीर तीं वाचनालयांत गेल्लीं.
अशें चित्र जायत्या शाळांनी आसतलें. हाका लागून चंद्राची म्हायती दिवपी पुस्तक, इस्रोची म्हायती दिवपी पुस्तकां भुरगीं विचारतलीं हातूंत दुबाव ना. पूण आतां वेबसायटी वरवीं तुमी हाची म्हायती घेंव शकतात आनी तुमी ती जरूर घेवची. फक्त विज्ञान फाट्याक वचपी भुरग्यांनीच न्हय तर सगळ्यांनीच ती घेवची. संशोधक ना जाल्यार वैज्ञानिक जावपा खातीर सद्यां तरी तुमकां विज्ञान फाटो घेवपाक जाय. खेरीज भौतिक शास्त्र, गणित हे सारके विशय तुमकां आवडूंक तरी जाय. पूण, जायत्या जाणांची इत्सा आसता झटपट पयशे मेळोवन दिवपी नोकरी मेळटली, अश्या फांट्यांत शिक्षण घेवचें. तें सगळ्याच फाट्यांनी जाता अशें ना. आनी आमी जें काम करतले तें लोकां खातीर हें जर आमी मतींत धरलें तर वैज्ञानिक, संशोधक आमच्या देशांत चड निर्माण जावं शकतात. परदेशी लोकांक आजुनूय भारतीयां विशीं अजाप दिसता. इतली लोकसंख्या, गरिबी आसुनूय हांगा हुशार विद्यार्थी कशे तयार जातात काय, हो प्रस्न तांकां सतयता. हालींच्या कांय वर्सांनी विदेशी लोक भारतीयांक मान दितात. हालींच जपानच्या भोवंडेर गेल्ले महाराष्ट्राचे उपमुख्यमंत्री देवेंद्र फडणवीस हांकां थंयच्या एका विद्यापीठाची डी लिट दिल्ली, तुमी पळयलां, आयकलां आसतलें.
वैज्ञानिक ना जाल्यार संशोधक जावप हें सोंपें नासता. तुमी चंद्रयान मोहिमे वेळार इस्रोचे संशोधक दाखयल्ले तातूंत आपूण आसचो अशें तुमकां दिसना? पूण ही वाट कांट्या कुट्यांनी भरिल्ली आसा. एक म्हळ्यार तुमी हुशार तर आसुंकूच जाय, खेरीज तुमचो विज्ञान विशय बरे पैकी आसपाक जाय. जसो एखाद्या संत मनशाक देवा खेरीज आनीक कांयच दिसना. तो विचार करतना लेगीत देवाचोच विचार करता. तशे पद्धतीन विज्ञान फाट्याचा विद्यार्थ्यांची स्थिती आसपाक जाय. शाळेन जर विज्ञानाची एखादी कार्यावळ आसत तर तातूंत तो वांटेकार जातलो, मुखेल सोयऱ्यांक विज्ञानाचे दुबाव विचारतलो. जर एखादी संस्था विज्ञाना वयल्या विशयाचेर एखादें व्याख्यान दवरता तर मुजरत तें आयकूंक वतलो. आतां स्मार्ट फोना वरवीं तुमकां जायती म्हायती मेळूं शकता. ह्या स्मार्ट फोनाचो उपेग तो विज्ञानाच्या म्हायती खातीर वापरतलो. एक म्हळ्यार गणीत आनी भौतिकशास्त्र हें विशय तुमका आवडपाक जाय. तातूंत तुमी प्रगती दाखोवपाक जाय. हाचो अर्थ ताणें हेर कार्यावळींनी वांटेकार जावप ना अशें ना. पूण जाय तितलेंच जावप. गोंयां भितर जी विज्ञान केंद्रा आसात तेका मुद्दाम भेट दिवप देखीक गोव्या भितर मिरामार हांगा गोवा विज्ञान केंद्र आसा थंय विंगड विंगड यंत्रां आसात, जीं विज्ञानाच्या आधारेचेर चलतात हें तुमी जाणून घेंवक जाय. ऑलिम्पियाड सारकी परिक्षा आसता तिका अजून फावो तितलो प्रतिसाद मेळना. तातूंत तुमी आपुण जावन वांटेकार जावपाक जाय. विज्ञान फांट्याक ओंपिल्लें दिसाळे ना, पूण मासिकां आसात. ताचें वाचप चालू दवरचें. आतां तर डिजिटल कॉपी तुमी घरांत बसून वाचूं शकतात. जर शक्य जालें तर गोंयां भायर ज्यो वैज्ञानिक संस्था आसात, तांकां भेट दियात. ताची म्हायती तुमका स्मार्ट फोना वरवीं, तुमच्या शिक्षकां वरवी मेळूं शकता. सगळ्योच गजाली पयशांचेर जाताच अशें ना, पूण ह्या फाट्यान तुमकां घडयेक पॅकेज जाय तशी मेळटलीच अशें ना. घर दारुय सोडचें पडटलें, पूण समाधान मात नक्कीच मेळटलें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
