भांगरभूंय | प्रतिनिधी
खबरां संस्था
अहमदाबादः अंदूच्या वन-डे वर्ल्ड कप क्रिकेट सर्तीचें येजमानपद भारता कडेन आसा. वर्ल्ड कप सर्तींत 5 ऑक्टोबराच्यान सुरवात जातली. ताचे पयलीं 4 ऑक्टोबराक अहमदाबादच्या नरेंद्र मोदी स्टेडियमाचेर उक्तावण सुवाळो जावपाक शकता. ह्या सुवाळ्यांत बॉलिवूड स्टार वांटो घेवपाची शक्यताय आसा. ह्या दिसा सगल्या 10 पंगडाचे कॅप्टन हाजीर रावतले. दुसऱ्या दिसा पोरूंचो वस्ताद इंग्लंड आनी न्यूझिलंड हाचे मदीं पयली मॅच जातली.
वर्ल्ड कपाचे सरावाच्यो मॅची 3 ऑक्टोबराक सोपतल्यो. ते उपरांत अहमदाबाद हांगा सगले कॅप्टन मीडिया कडेन संवाद सादून फोटे काडटले. व्हो दीस कॅप्टन डे म्हणून वळखतात. वर्ल्ड कपाची फायनल 19 नोव्हेंबराक अहमदाबाद जातली. आंतरराष्ट्रीय क्रिकेट परिशदेचे वांगडी, कार्यकारी मंडळाचे वांगडा आनी बीसीसीआचे प्रतिनिधी ह्या वेळार हाजीर रावतले. उक्तावण सुवाळ्याच्या एक दीस पयलीं 10तले 6 कॅप्टन खूब व्यस्त आसतले. भारताची सर्त नेदलँडा कडेन, पाकिस्तानाची ऑस्ट्रेलिेये कडेन आनी श्रीलंकेची अफगाणिस्ताना कडेन जातली. मॅची सोपले उपरांत स पंगडाचें कॅप्टन दुसऱ्या दिसा सकाली अहमदाबाद येतलेय
वर्ल्ड कपाच्यो वट्ट 58 मॅची जातल्यो. तांतूंत 10 सराव मॅचींचो आसपाव आसा. मॅची भारताच्या हैदराबाद, अहमदाबाद, धरमशाला, दिल्ली, चेन्नय, लखनौ, पुणे, बंगळुरू, मुंबय आनी कोलकात ह्या शारांनी जातल्यो. गुवाहाटी, तिरुवनंतपुरम आनी हैदराबाद हांगा सराव मॅची जातल्यो. वर्ल्ड कपांत श्रीलंका आनी नेदरलँडाचे पंगडा पात्रताय फेरयेंतल्या हे सर्तींत पावल्यात, भारत, न्यूझिलंड, इंग्लंड, ऑस्ट्रेलिया, बांगलादेस, पाकिस्तान, दक्षीण आफ्रिका आनी अफगाणिस्तान सर्ती खातीर पात्र थारल्यात.
वर्ल्ड कपांतल्या पंगडाचे कॅप्टन फुडले भशेन- पाकिस्तान- बाबर आझम, इंग्लंड- जोस बटलर, ऑस्ट्रेलिया- पॅट कमिन्स, न्यूझिलंडृ टॉम लॅथम, श्रीलंका- दासुन शनाका, बांगलादेश- शकिब अल हसन, नेदरलँड- स्कॉट एडवर्ड, दक्षीण आफ्रिका- टेम्बा बावुमा, अफगाणिस्तान- हशमतुल्ला शाहिदी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
