भांगरभूंय | प्रतिनिधी
गोंय विद्यापिठाच्या आंतरम्हाविद्यालयीन ज्युडो सर्तींत दादल्यांच्या गटांत नावेलीच्या रोझरी म्हाविद्यालयान जाल्यार बायलांच्या गटांत मिरामारच्या व्ही एम साळगांवकार कायदो म्हाविद्यालयान सांघीक वस्तादपण जोडलें.
सर्त ताळगांव पठारा वयल्या विद्यापिठाच्या ज्युबली हॉलांत जाली. दादल्यां गटांत 81, जाल्यार बायलांच्या गटांत 70 स्पर्धकांनी वांटो घेतिल्लो.
मडगांवच्या श्री दामोदर म्हाविद्यालयाच्या साहिल खानवीलकारान आनी बायलांच्या गटांत साळगांवकार कायदो म्हाविद्यालयाचे इराम खत्री हिका सर्वोत्कृश्ट ज्युडोचो पुरस्कार फावो जालो.
दादल्यांच्या गटांत सांखळी सरकारी म्हाविद्यालय उपवस्ताद, जाल्यार शिरोडेंच्या श्री रायेश्वर इन्स्टिट्यूट, फर्मागुडीच्या रवी एस नायक म्हाविद्यालय, पोरणें गोंयच्या गोंय शेतकी म्हाविद्यालय आनी मडगांवचें श्री दामोदर म्हाविद्यालय हांचे मदीं विभागून दिलो. बायलांच्या गटांत आसगांवच्या डीएम्स म्हाविद्यालय आनी खांडोळें सरकारी म्हाविद्यालय हे जोड रितीन उप वस्ताद थारले.
दादल्याच्या गटांतल्या इनामां भेटवण सुवाळ्याक मडगांवच्या कारे कायदो म्हाविद्यालयाचे शारिरीक शिक्षण आनी खेळां संचालक मनोज हेदे, गोंय खेळां प्राधिकरणाचे ज्युडो प्रशिक्षक मीर डायस उपस्थीत आशिल्ले. बायलांच्या गटांतल्या इनाम भेटवण सुवाळ्याक पर्वरीच्या विद्या प्रबोधिनी म्हाविद्यालयाचे शारिरीक शिक्षण आनी खेळां संचालक सनी काणेकार, गोंय विद्यापिठाचे शारिरीक शिक्षण आनी खेळां सहाय्यक संचालक भालचंद्र जदार उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
