भांगरभूंय | प्रतिनिधी
भारताचो बॅडमिंटन खेळगडो एच एस प्रणॉय हाणें डॅनमार्काच्या कोपेनहेगन शारांत चालू आशिल्ले संवसारीक बॅडमिंटन वस्तादपण सर्तींत दोन खेपेचो आदलो वस्ताद डॅनमार्काच्या व्हिक्टर एक्सेलसनाक हारोवन आपलें पदक निश्चीत केलें.
संवसारीक बॅडमिंटन वस्तादपण सर्तींत तिसरे आनी चवथे सुवाते खातीर मॅच जायना. जाल्यार दोनूय खेळगड्यांक कांश्या पदक दितात. ताका लागून सेमी फायनलींत सुवात मेळना फुडें प्रणॉयान किमान कांश्या पदक निश्चीत केलें.
68 मिनटां मेरेन चलिल्ले क्वॉर्टरफायनलींत प्रणॉयान पदक निश्चीत केलें आसलें तरी एक्सेलसना आड प्रणॉयान सामकी बाबत सुरवात केल्ली. प्रणॉय पयली गेम सहज हारलो. पूण, उपरांत मॅचींत पुनरागमन केलें आनी उरिल्ल्यो दोन गेमी 21-15 आनी 21-16 अशा फरकान जिखल्यो. निमाणी गेम चड उमळशीक वाडोवपी थारली. प्रणॉयान जलद खेळ करून तिसरे गेमीत सुरवात केली. पूण, एकेक गुणा खातीर दोनूय खेळगड्यांक घाम गळोवचो पडलो. उपरांत प्रणॉयान 7-6च्या स्कोराचेर सेगीत पांच गूण जिखून प्रतिस्पर्धी खेळगड्याची लय तोडली आनी स्कोर 12-6 केलो. फाटीं पडिल्ल्या एक्सेलसनाक ताच्या घरच्या प्रेक्षकांनी ताचो आत्मविस्वास वाडोवपाचो यत्न केलो. हाचो फायदो एक्सेलसनाक जालो. ताणें सेगीत दोन गूण घेतले. स्कोर आतां 12-8 असा जालो. प्रणॉयान एक गूण घेतलो.
एक्सेलसनान स्मॅश मारलो आनी स्कोर 13-9चेर व्हेलो. उपरांत दोन गूण घेतले अशे तरेन स्कोर 13-11 जालो. प्रणॉयान आपली एकाग्रता वगडावपाक दिली ना. ताणें नेटान पुनरागमन करतना स्कोर 16-11 असो केलो. 16-11 वयल्यान 18-14चेर पावलो. प्रणॉयान आक्रमक खेळ करून गेम 21-16 फरकान जिखली.
प्रणॉय आतां सेमी फायनलींत संवसारीक क्रमवारींत तिसरे सुवातेर आशिल्ल्या कुनलावूत विट्रीडसॅरन आड खेळटलो. ही मॅच आयज जातली.
केरळाच्या 31 वर्सां पिरायेच्या प्रणॉयान अंदूं मलेशिया मास्टर्स सुपर 500 आनी ऑस्ट्रेलियन ओपन सुपर 500ची फायनल सुवात मेळयिल्ली. ताणें उत्कृश्ट फॉर्मा नेटार संवसारीक बॅडमिंटन वस्तादपण सर्तीचे सेमी फायनलींत सुवात मेळोवन भारताचें वट्ट 14वें पदक निश्चीत केलें. भारतान आतां मेरेन 14 पदकां जिखल्यात. हातूंतली 5 पदकां फकत पी व्ही सिंधून जिखल्यात. हातूंत 2019तल्या भांगरा पदकाचो आस्पाव आसा. सायना नेहवालान रुप्या पदक आनी कांश्या पदक, किदाम्बी श्रीकांतान रुप्या पदक, लक्ष्य सेनान कांश्या पदक, बी साई प्रणीतान कांश्या पदक आनी प्रकाश पदुकोण हाणें कांश्या पदक जिखलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
